Prevene Moras LF no STH, MS Fahe Aimoruk Ba Komunidades

Hahu fulan Marsu tinan ne’e (2016) Ministerio Saude (MS) liu husi programa Mass Drug Administration (MDA) fahe aimoruk Diethylcarbmazine (DEC) no Albendazole ba komunidades iha teritorio tomak hodi prevene moras limfatik filariasis (LF)  ou Ain-Potis no Soil Transmitted Helminthiasis (STH)/ Infesaun Lumbringa.

Konsultan Nasional Neglected Tropical Diseases (NTDs) Ministerio Saude, Paulino Pinto, hateten iha tinan 2005-2007 sira fahe ona aimoruk iha munisipio balun, depois paradu tanba laiha orsamentu. 

“Ita nia survey hatudu katak Timor-Leste iha prevalensia ba moras ne’e maka’as, tanba ne’e ita tenke halo intervensaun agora kedas, ita lakohi hein tan,”  Konsultan Pinto informa, iha Hotel Timor, Dili. 

Nia dehan, ema hotu ne’ebe liu ona tinan 2 (idade) bele hemu aimoruk ne’e hodi prevene aan husi lumbringa filarial ne’ebe kauza ba ain potis. 

Nia esplika, ema ne’ebe labele hemu aimoruk ne’e mak hanesan inan isin rua, inan fo susu, ema moras kankru, rins no fuan, tanba aimoruk ne’e iha reasaun. 

Nia mos, husu komunidades atu labele paniku ho reasaun aimoruk (ulun moras, isin kolen, isin manas, laran sae), tanba aimoruk ne’e seguru no oho lumbringa nia tolun ne’ebe kauza ba moras limfatik filariasis (ain potis). 

“Reasaun sira ne’e mosu tanba parasite eziste duni iha ita nia ran,” nia hateten. 

Nia esplika liu tan, kuandu durante tinan 4-6 transmisaun ne’e la’o no laiha tratamentu, mak sei afeta no bele hetan moras ain potis (ain bubu bo’ot, liman bubu bo’ot, susun bubu bo’ot (feto) no sasan lulik (mane) bubu bo’ot), tanba bakteria filarial estraga ona sistema limfatiku ema nian. 

Tuir survey ne’ebe Ministerio Saude halo iha tinan 2012, hatudu katak moras ida ne’e eziste ona iha teritorio Timor laran tomak. 

Iha peskiza ne’ebe iha, nia dehan, munisipio Covalima sai primeiru lugar ho kau 35%, Manufahi 30.7%, Ermera 30.5%, Bobonaro 23.7%, regiaun especial Oe-Cusse 23.2%, Ainaro 18.4% , Manatutu 18%, Lautem 14.5%, Liquisa 13.9%, Aileu 13.7%, Dili 11.2%, Viqueque 10.4% no Baucau 10.3%.

Entretantu consultan internasional ba Organizasaun Saude Mundial (OMS),Dr. C. R. Revankar, esplika katak limfatik filariasis (ain potis) mak moras hadaet ne’ebe kauza husi lumbringa filarial. 

Nia dehan, transmisaun bakteria ida ne’e husi ema ida ba ema seluk liu husi susuk anopheles barbirostris, Culex no susuk aedes grupo mansonia ne’ebe afetado ona ho bakteria.  

“Laiha vasinasaun ba iha limpatik filariasis, tanba ne’e ita iha programa MDA atu fahe aimoruk ba iha komunidades tinan ida dala ida durante tinan liman nia laran atu prevene aan,” doutor Revankar esplika. 

Nia esplika liu tan, katak sintomas ba moras ain potis (lymphatic filariasis) ne’e hanesan mos moras baibain (isin manas malirin, isin mean sai bubu), maibe atu diagnostiku klaru, tenke halo teste ba ran. 

“Komunidade nia konesementu kona ba lymphatic filariasis menus tebes, tanba ne’e organizasaun saude mundial servisu hamutuk ho ministeriu saude koko hodi fahe informasaun ba komunidades,” nia hateten.

The Dili Weekly