ZEBRA BAUCAU LIDERA GRUPU ‘A’, HAFOIN FESTA GOLU BA ULTRAMAR 8-2

Ekipa Zebra FC núdar klube futebol ne’ebé reprezenta munisipiu Baucau lidera grupu ‘A’ hafoin festa golu ba Atletico Ultramar FC ne’ebé reprezenta munisipiu Manatuto ho score 8 á 2, iha jogu kontra atake segundu divizaun kampionatu Liga Futebol Amadora (LFA) Timor Leste mak hala’o iha Stadium Munisipal Dili, Kinta (31/03/2016).

Hafoin remata jogu kontra atake entre ekipa rua ne’e, Treinador Zebra FC, Jaime Ribeiro ba jornalista sira hateten, nia ekipa hatudu hikas fali sira nia identidade jogu hafoin iha jogu badauluk kontra ekipa Sport Dili Benfica.

Treinador ne’ebé ho status núdar mós ex-futebolista hahateten liu tan kata, hafoin rezultadu jogu ba-dauluk ne’ebé senti seidauk hatudu jogu ne’ebé másimu, entaun husi oficial hamutuk ho manajamentu strutura ekipa tau idea hamutuk, para oinsa bele melhora ekipa ne’e hodi ba hasoru jogu sira tuir mai.

Treinador ne’e, senti kontenti ba rezultadu ne’ebé mak nia ekipa hetan, tanba ida ne’e mak Zebra hakarak hatudu ba públiku nomos nia adeptus tomak.

“Ami hetan fali ona ekipa ne’e nia identidade jogu, tanba rezultadu ida ne’e hatudu tuir ekipa nomos adeptus tomak ninia mehi,” salienta treinador Zebra Jaime Ribeiro

Jaime Ribeiro realsa, “Ami fiar katak iha jogu tolu ikus mai, Zebra Baucau hakarak hetan pontus 9 hodi hakat ba primeira divisaun tuir ambsaun ne’ebé mak iha ona,”

“Ami laiha mudansa, maibe hafoin rezultadu iha jogu primeiru ne’ebé mak imvolve iha kompenenti klubu ida ne’e aseita atu oinsa mak bele harmonia fali ekipa, entaun núdar gerasaun foun mak ba oin hodi akompanña jogadores wainhira tun ba kampu halo jogu kontra-atake ho ekipa ne’ebé mak sai núdar adversariu, tanba ne’e mak treinador Zebra FC oras ne’e iha ami nain rua (Jaime Ribeiro-Cornelio Moc) mak kontinua akompanña ekipa ne’e nia lalaok, ne’ebé laiha substituisaun treinador, maibe ami hakarak no iha intesaun atu halo harminizasaun ba klubu Zebra Baucau,”salienta terinador Zebra Baucau FC Jaime Ribeiro.

Jaime Ribeiro Salienta liu tan, liu husi harmonizasaun ne’e públiku bele haree, oinsa maka Zebra hatudu hikas nia jogu, liu husi mudansa ne’ebé ekipa Zebra FC halo ne’e iha rezultadu hatudu pozitivu.

Iha tempu no fatin ne’ebé mak hanesan kapitaun ekipa Zebra FC, Helder Mota senti kontenti ba rezultadu ida ne’e tanba fo fali motifasaun boot ba ekipa hodi bele haree joga tuir mai.

“Ami sei iha tan jogu tolu, no ami kontinua iha ambisaun atu manan jogu hirak ne’e, entaun Zebra FC tenke melhora nafatin ami nia ekipa liu husi treina tatika no fiziku, ne’ebé mak ami senti falta hodi rezulta sofre golu rua iha jogu ida ne’e,” afirma kapitaun ekipa Zebra FC Mota.

Parte seluk, Treinador Atletico Ultramar Gaspar Quintão hateten, ida ne’e mak fenomena iha vida desportu jogu futebol, ohin bele sai núdar vensedor no aban bele derota fali.

“Ami sei kontinua haka’as-àn liu husi preparasaun ne’ebé mak tenke halo atu bele hasoru jogu hirak tuir mai, tanba mentalidade mós sai meius determinante ba kada jogu, no hau rekuinñese ami nia jogadores afeita, tanba iha jogu primeira parte deit ami sofre uluk golu hat no kontinua aumenta golu hat (4) iha jogu segunda parte.

Treinador Ultramar FC, Quintão dehan, núdar treinador, sei kontinua f’o spiritu ba jogadores ekipa atu bele haforsa mentalidade hodi hasoru fali jogu ikus mai.

Rezultadu ne’e mak Zebra Baucau FC, okupa hikas posisaun primeira klasifikasaun grupo ‘A’ ho Pontus ‘4’, husi jogu rua ne’ebé mak ekipa ne’e hala’o tiha ona, no Atletico Ultramar ne’ebé konsege lidera grupo ne’e tun fali ba posisaun terseira klasifikasaun. Ito

Jornal Macional