Diskunfia distribuisaun Uma MDG Uja Sistema Familiarismu

Komunidade Craras, munisipiu Viqueque, Beatriz Miranda, preokupa no konsidera distribuisaun uma Millenium Development Goal (MDG) iha nia fatin uja sistema familiarismu.

Tanba tuir feto faluk ne’e, iha Craras ema ne’ebe merese atu hetan uma MDG ne’e la hetan, maibe sira ne’ebe la merese hetan fali.

“Hau hakarak husu tanba sa uma kain ida ema nain lima hetan hotu uma MDG, maibe ami feto faluk sira la hetan uma ida ne’e,” nia lamenta. 

Nia rekonese, katak nia hetan subsidio martires nian kada fulan $230, maibe la ida ne’e sufsiente atu sustenta familia lor-loron no edukasaun ba oan sira. 

Diretor Nasional Asistensia Sosial Ministerio Solidaridade Sosial (MSS), Mateus da Silva, hateten ministerio estabelese deit kriterius ba benefisiarios, maibe lista mai husi autoridade local (xefe suku) sira. 

“Ami la tuun ba halo verifikasaun ba ema ida-idak, ami fo fiar los ba xefe suku sira, sira dehan ema ida ne’e vulneravel, ami aprova,” Diretor da Silva. 

Kona ba ema la vulneravel hetan uma MDG, nia dehan, iha razaun rua ;  primeiru tanba sira mak fo rai ba estado hodi harii uma, segundu benefisiario sira lakohi ba hela no entrega fali ba membru familia seluk ne’ebe fisikamente forte. 

Nia dehan, benefisiario sira balun lakohi ba hela iha uma ne’e tanba do’ok husi sira nia hela fatin (agora) no sira lakohi husik sira nia to’os. 

Nia informa, kriterius atu hetan uma ne’e mak ema ne’ebe ho defisientes, ferik no katuas, feto faluk ne’ebe iha oan barak no laiha rendementu. 

Tuir dadus MSS nian total uma MDG ne’ebe governu harii iha munisipios 9 (Lautem, Viqueque, Liquisa, Ermera, Ainaro, Covalima, Bobonaro, Aileu, Manatuto no Manufahi) hamutuk 2861, ho benefisiarios 5592.  

Husi numeru ne’ebe iha, nia dehan, uma 1831 mak seidauk entrega tanba seidauk remata. 

Iha parte seluk Prezidente komisaun D Parlamentar (ekonomia e dezenvolvementu), Deputada Jacinta Abucau Pereira, hateten iha sira nia fiskalizasaun iha baze identifika uma MDG barak mak abandona no aat ona. 

“Husu Agensia Dezenvolvimentu Nasional (ADN) atu haree fila fali uma ida ne’e tanba barak ho kondisaun aat,” nia sujere.

The Dili Weekly