L-7 LAKOHI METE POLÉMIKA EZONERASAUN

Fundador Organizasaun Rezisténsia Sagrada Familia, Cornelio Gama ‘L-7’ deklara lakohi hatama kanuru tohar (lakohi mete,red) polémika ezonerasaun entre veteranu sira kona-ba ba kargu Xefias Falitil Forsa Defeza Timor Leste (F-FDTL) nian, tanba ida ne’e polítika ukun na’in sira nian.

“Ohin loron, ita haree problemas bo’ot entre ita nia nai ulun sira, ita labele tau ita nia kanuru tohar, ne’e husik sira nian, ita ko’alia kona-ba ita nia Sagrada Familia,” dehan L-7 iha konferensia imprensa ne’ebé hala’o iha Vila-Verde Dili, Kuarta (04/05).

Eis rezisténsia haktuir katak, polítika ne’e, husik ba ulun bo’ot sira mak halo, maibé kona-ba dezenvolvimentu, Sagrada Familia tenke involve-an.

“Kona-ba veteranu sira, ami hanoin katak, nia instituisaun ne’e iha, sira mak bele ko’alia, sira tuur iha ne’ebá ne’e, povu mak hili sira,” katak L-7.

L-7 esplika katak, organizasaun Sagrada Familia ne’e, la’os atu haree ba polítika, maibé atu haree ba povu nia moris no lala’ok dezenvolvimentu.

“Ami tama fali polítika hodi kahur fali ami nia Sagrada Familia ne’e, ami sala ona,” katak L-7.

Tanba ne’e eis Komandante Rejiaun III iha tempu rezisténsia ne’e hatutan katak, Sagrada Familia tenke buka atu ajuda Governu konaba lala’ok dezenvolvimentu hodi povu bele moris di’ak.

“Ita tenke hatene saida mak ita atu kaer iha 2017 ba leten, tanba ita liberta tiha ona ita nia nasaun ida ne’e, ita nia povu balun sei halerik no tanis. Ita hakarak moris di’ak para aban bainrua ita labele moris iha konflitu entre ita nia uma laran, entre domin, dame no paz i progresu,” katak L-7.

L-7 dehan tan, saida mak hanoin atu halo di’ak ba nasaun doben ne’e, tenke konsulta malu, labele ema ida de’it mak ko’alia no halo, no tenke haree ba povu sira ne’ebé tuur ka moris la hakmatek, tanba Sagrada Familia nia hakarak ne’e, la’os atu hakuak de’it membru Sagrada Familia nian, maibé hakuak povu Timor Leste (TL) tomak. cos

Jornal Nacional