Koperasaun universitáriu importante hodi hametin ensinu superior - ministru timoroan

Globalizasaun no interdisiplinaridade boot hosi koñesimentu eziji liután kolaborasaun no koperasaun entre entidade sira hosi ensinu superior, hodi harii esperiénsia akadémiku sira diversifikadu liu no fleksivel liu, hatete hosi ministru edukasaun timoroan nian.

António da Conceição hatete katak hanesan realidade ida ne'ebé permiti daudaun aumenta oferta edukativu iha ensinu superior iha mundu tomak, kontribui ba "prosesu demokratizasaun ba asesu ba ensinu superior".

António da Conceição ko'alia iha reuniaun ba dala 26 hosi Asosiasaun Universidade sira Lian Portugés nian (AULP) ne'ebé sei hala'o to'o loron-sesta iha Díli no marka prezensa hosi reprezentante sira hosi instituisaun sira ensinu superior nian no investigasaun nian hosi nasaun luzófonu sira no hosi Makau, nune'e mós hosi nasaun sira seluk rejiaun nian.

"Ensinu superior hanesan fatór importante ba nasaun ida hodi hetan koñesimentu, inovasaun no teknolojia nesesáriu hodi kompete iha mundu globalizadu. Rekursu ema sira nian hosi nasaun ida-idak ohin loron tenki prepara hodi kompete iha merkadu ida serbisu nian ne'ebé global tebes", nia defende.

"Dezempeñu ekonómiku hosi nasaun sira iha relasaun diretu ho kapasidade hosi nasaun sira hodi kria koñesimentu. Formasaun avansadu no siénsia ohin loron hanesan fonte hosi rikusoin nasaun sira nian", nia hatete.

Tuir nia hatete katak reuniaun hosi AULP hanesan oportunidade ida "hodi halibur kbiit sira no hanoin programa multilateral sira ne'ebé promove kresimentu harmoniozu ida hosi universidade sira iha espasu lian portugés nian".

"Iha mundu ida hodi esplora, ne'ebé refere ba fahe koñesimentu, ba sirkulasaun hosi estudante sira, ba formasaun hosi dosente sira, ba dijitalizasaun hosi material didátiku sira no mós ba asesu ba programa sira finansiamentu ba investigasaun sientífiku", nia hatete.

Iha kazu Timor-Leste nian, nia hatete katak prioridade tenki kontinua iha "koperasaun iha formasaun dahuluk no kontínua hosi profesór sira, tanba hanesan rekoñesidu katak iha nível ne'e, duké nível sira seluk, maka sei muda, sei kualifika, sistema sira ensinu nasional nian".

António da Conceição hatutan mós importánsia, iha ámbitu hodi kontinua aposta iha "aprendizajen lian portugés", "fatór krítiku ida ba susesu eskolar" no ne'ebé nia domíniu "hanesan matenek kondisionador di'ak tebes".

"Tanba ne'e maka lorok hirak tuirmai sei hanesan oportunidade di'ak ida ba diálogu no ba reflesaun sinérjiku kona-ba estratéjia foun sira ba promosaun no difuzaun Lian Portugés nian, iha nível ensinu superior", nia refere.

Dezafiu ida ne'ebé permanese iha Timor-Leste no "ne'ebé tenki hetan apoiu no koperasaun" hosi CPLP, hodi garanti katak "sei hanorin no aprende iha portugés iha instituisaun sira ensinu superiór nian iha nasaun".

Partisipa iha enkontru iha Díli - ne'ebé hala'o ho tema "mobilidade akadémiku no globalizasaun iha CPLP nia laran no iha Makau" - espesialista no reprezentante universitáriu sira no hosi instituisaun sira ensinu superior hosi CPLP, Makau, Indonézia, Austrália, Malázia no sira seluk hamutuk atus resin no sei iha komunikasaun hamutuk 50 resin.

Polítika no estratéjia sira viabilizasaun hosi mobilidade akadémiku iha nasaun luzófonu sira, lian portugés iha difuzaun no dezenvolvimentu hosi siénsia sira no dezafiu hosi Instituisaun sira ensinu superior AULP nian hanesan tema balun iha debate.

Enkontru sei analiza mós "rota sira hosi signu: sentidu, migrasaun sira no interkulturalidade" no mós "paizajen sira, natureza no kultura".

SAPO TL ho Lusa