DIA 7 JULHO, RUIN SAUDOZU RODAK ENTREGA BA ESTADU

Familia boot saudozu Komandante FALINTIL Cipriano Martins‘ RODAK’, sei entrega ruin saudozu (RODAK) nia ba estadu iha loron 7 fulan Julhu mai nee.

Alem de rui saudozu Rodak familia heroi de libertasaun nee mos entrega ruin saudozu nain rua seluk, Domingos Gorreti no Saudozu Lewekeri nebe uluk mate hamutuk ho komandante RODAK.

Saudozu RODAK no Saudozu Lewekeri husi postu administrativu Laga, Municpiu Baucau no saudoza Domingas Gorreti husi postu administrativu Laivai, Municipio Lautem.

Ruin saudozu nain tolu sei entrega ba Estadu atu halibur hamutuk iha Jardim dos Herois Metinaro.

Tuir planu urnas saudozu sira nian sei lori husi Suku Binagua, Postu Administrativu Laga mai iha Dili, iha dia 7 de Julho 2016.

Atu fasilita prosesu transferensia urnas saudozu sira nian, ho di’ak, mak familia sira forma ona komisaun ba resepsaun urnas saudozu sira nian, ne’ebé kompostu husi Komisaun organizadora prinsipál ne’ebé lidera husi eis Komandante Rejiaun III no veteranu Cornelio Gama L-7 iha Laga no Sub Komisaun atu simu urnas saudozu sira nian iha Díli maka lidera husi Manuel Guterres Correia “ Manuel Maka’as”.

Komisaun sira ne’e ninia funsaun maka atu organiza prosesu tomak hahú husi transferensia to’o venerasaun kalan iha Díli-Akadiru-hun, selebrasaun misa iha Igreja Motael, lori urnas ba iha Comite Central FRETILIN (CCF) to’o entrega ba Estadu hodi halibur hamutuk iha Jardim dos Herois Metinaro.

Tuir Prezidenti Sub Komisaun ba Resepsaun Urnas Saudozus na’in tolu nian ne’ebé rezidenti iha Díli, Manuel Maka’as katak, prosesu transferensia urnas husi Laga mai Díli, sei organiza husi Komisaun Prinsipál husi Laga, hamutuk ho familias saudozu na’in tolu nian ho mós komunidade Munisípiu Baucau no Lospalos.

Entretantu Sub Komisaun Díli hamutuk ho família sira sei simu urnas saudozu sira nian iha Metinaro molok lori mai iha uma familia saudozu Rodak nian iha Bidau-Akadiru-hun.

“Prezidenti komisaun husi Laga, katuas Eli, Sr. Cipriano Masukote ho Xefi Suku na’in walu, hamutuk ho Liurai, sira halo ona komisaun iha ne’ebá (Laga), mak hato’o mai iha Díli atu hodi prepara mós Sub Komisaun ida ne’e para hodi simu ita nia saudozu nu’udar martir da patria Komandante Rodak no ninia soldadu Lewekeri ho saudosa Domingas Gorreti hodi mai iha Díli molok entrega ba Estadu”, dehan Manuel Maka’as.

Manuel Maka’as hatutan katak, saudozu nia ruin tolu nee la’o hamutuk, tanba iha momentu ne’ebá sira na’in tolu ne’e inimigu tiru mate hamutuk iha fatin ida deit iha parte Laga nian.

Tuir Manuel Maka’as katak, saudozu sira nia ruin ne’e, Jenerel Lere hamutuk ho família saudozu sira nian iha Laga no Lospalos maka ba buka no deskobre fatin hakoi nian, depois kee no lori mai rai iha Binagua, no ohin loron familia sira forma ona komisaun para atu lori mai entrega ba Estadu.

Husi sorin seluk familia nu’udar mós sidadaun Postu Administrativu Laga ne’ebé rezidenti iha Díli, Januário Sebastião da Silva, haklaken katak, nu’udar familia ne’ebé hela iha Díli, prontu atu simu urnas saudozu sira (Komandante Rodak, no soldadu Lewekeri no saudoza Domingas Gorreti) nian iha Díli.

Januário hatutan, nu’udar família prontu mós atu simu saudozu sira hodi deskansa hamutuk ho familia sira iha Dili, molok entrega ba CCF no Estadu atu halót.

Januário mós husu ba Estadu, la’os saudozu na’in tolu ne’e deit maka Estadu atu halot maibé restus mortais sira seluk ne’ebé sei rai hamutuk iha Laga no sira seluk ne’ebé seidauk buka tuir ne’e, tenki buka para halibur hamutuk iha fatin ida deit.

Tuir horáriu urnas saudozu sira nian sei lori husi Laga mai Díli iha dia 7 Julho meiu dia, no familia sira iha Díli sei simu iha Metinaro depois kontinua lori mai hader hamutuk iha Bidau Akadiiru-hun.

Iha Dia 8 de Julho, dadersan sei halo selebrasaun misa iha Igreja Motael no depois de misa urnas saudozu sira nian sei lori ba iha CCF hodi fó homenajen.

Depois sai husi CCF sei kontinua lori saudozu sira nia urnas ba iha Semitériu Herois da Patria Metinaro.ias/ixo

Jornal Nacional