PR TAUR: VETERANUS BALUN HAHÚ SENTE-AN, SIMU OSAN ESTADU SAUGATI

Prezidenti Repúblika (PR) Taur Matan Ruak haklaken katak, veteranus balun iha Timor Leste (TL) komesa sente-an ona katak, durante ne’e sira simu no goza osan Estadu nian saugati de’it. Maibé Taur Matan Ruak dehan, nia louva tebes veteranu sira ne’e, tanba bele deskobre sai saida mak sira sente.

“Iha veteranus n mak komesa sent-ean katak, ami moe fali tanba simu osan saugati husi Estadu nunka halo buat ida,” afirma PR Taur Matan Ruak iha Suku Eraulo, Postu Administrativu Letefoho, Munisípiu Ermera, Segunda (27/06), bainhira diálogu ho komunidade iha Suku refere.

Xefi Estadu ne’e afirma, nia vizita Suku sira iha Timor laran tomak ho objetivu ida de’it, halo povu sente katak, povu  mak na’in ba rai ida ne’e, tanba kuandu sente katak, rai ne’e sira nian, povu sei halo esforsu barak atu ajuda Estadu.

Taur Matan Ruak dehan tan katak, Estadu sei la haluha veteranu sira iha Timor laran tomak, maibé tenki rezolve nei-neik, tanba veteranus iha TL barak.

Nia haktuir, veteranus ne’e sai ona problema bo’ot iha TL, tanba ema sira ne’ebé simu ona osan, senti kontenti, maibé ema sira ne’ebé seidauk simu, laran moras fali sira ne’ebé simu ona.

Problema veteranus ne’e ohin loron sai bo’ot tanba osan, ema hotu hakarak simu osan. Maibé Taur Matan Ruak dehan, veteranus sira tenki hamutuk hodi rezolve problema ida ne’e, atu labele husik hela problema ne’e ba Estadu.

Taur Matan Ruak relata lia hirak ne’e hodi responde ba veteranu Jeraldo da Costa Maia, ne’ebé hatete katak, veteranus ne’ebé mak rejistu iha 2003 ninian, to’o agora barak sei pendente hela, oinsa PR Taur nia  hare ba ida ne’e.

“Ami husu ba Prezidenti Repúblika, durante ita bo’ot nia mandatu, se bele karik rezolve hela problema hirak ne’e,” katak Jeraldo.

Alende ne’e, Veteranu Carlos Maia hatete katak, nia hanesan veteranu ida ne’ebé moris ho povu iha área rural, triste tebes haree kondisaun moris povu nian agora.

“Ha’u hanesan ema veteranus ida ne’ebé mak moris hamutuk ho povu, mataben se monu nafatin, tanba povu se susar nafatin tanba estrada aat,” relata nia.cos

Jornal Nacional