LEOVIGILDO; “TENKE SERVI HO FUAN E AMOR”

Xefia kargu foun Sekretaria Estadu Juventude no Desportu (SEJD), iha eis-sional Lesidere Dili, Segunda Feira (27/06/2016) simu posse husi Komisaun Fungsaun Públiku (KFP). Xefia kargu foun refere, Sekretariu Estadu Leovigildo da Costa Hornai estende xefia kargu sira hamutuk nain 22 hodi kontinua ba tinan (2016-2018) oin mai tan, inklui mos xefia kargu foun sira hamutuk nain 5 ne’ebé substitui ona sira nia kompatriota iha fulan neén liu ba ne’e.

Iha seremonia tomada de posse refere, dekursu husi Sekretariu Estadu Leovigildo da Costa Hornai haktuir, politika VI Governu Costitusional ne’ebé lidera husi Sua Exelencia Premeiru Ministru Dr. Rui maria de Araújo nia preoridade ida mak dezenvolvimentu do seitor da Governasaun, signifika Governu ida ne’ebé respeita no tane áas prinsipiu burokrasia efisiensia, efikasia, baratu, kualidade, boa Governasaun no transparansia, responsavel no pronto atu servi ho ‘FUAN’ e ‘AMOR’ i la iha razaun seluk tan, husi prinsipiu ne’ebé mak temi ona.

Eis president Concelho Nacional Juventude Timor Leste (CNJTL) no actual sekretariu estadu juventude Leovigildo da Costa Hornai husu ba kada xefia kargu tenke halo uluk nia obrigasaun tomak depois mak husu direitu, kumpri lei no regras hotu ne’ebé vigor iha RDTL liu husi funsaun publiku, sai modelu ka referensia iha nia knar fatin (disiplina la halo kontra bandu), sai nudar aman no inan ba nia funsionariu sira signifika nia prontu atu sai atan no laos atu sai liurai, simu kritika no rona nia elementus sira no prontu atu kurizi, bolu atensaun bebeik ba nia elementus sira ho liafuan mamar no afirmtivu, sei la halo KKN, sei la abuzu de poder, sei hateten lae ba nia dirigente sira katak laos no kontra lei.

molok remata deskursu, SE Leovigildo hato’o nia mensajem ikus ba nia funsiunarius tomak mak, “hau mai tanba imi imi iha mak hau mai”, tanba ne’e mai ita servisu ho laran tomak fuan amor dedikasaun no prontu sai atan no trata parseiru sira ho dignidade no responsavel, i (familia mak nudar odamatan susesu nian tanba ne’e husu ba familia atu kontrola no akompaña no buka atu hatene ita bo’o nia familia nia komportamentu tomak).

Iha fain hanesan, intervensaun husi reprezentante KFP, Komisariu José Telo Soares Cristovão hateten, ba xefia kargu ne’ebé mak liu ona faze eksperimenta durante tempu fulan neen (6) liu ba hafoin SE Leovigildo da Costa Hornai públika sai naran husi kargu xefia-red, i agora dadaukne’e mak foin simu posse, ne’e la’ós komisaun fungsaun publiku mak hakarak maibe ne’e lei mak hakarak no haruka husi selesaun premeiru, nune’e bele hases husi tendensia politiku.

Konabá faze eksperimenta ba xefia kargu foun sira ne’e laos iha fulan ne’en deit, maibe mos bele aumenta tan ba fulan neen ba daruak nian. Tanba ne’e hau hanoin katak, ba oin xefe departamentu administrasaun rekursus humanus foun, bele kria no harii relasaun ne’ebé diak liu tan ho ami (KFP), nune’e hamutuk hodi haree no fó atensaun diak liu tan, aumenta komisariu José.

Funsiunarius kargu xefia foun tenke hatudu nia vontade servisu ne’ebé diak tuir nia responsabilidade ne’ebé mak nia simu, nune’e bele sai lalenok ba nia membrus funsiunarius tomak iha SEJD nomos ba instituisaun Guovenu sira seluk, husu komisariu José

Iha sorin seluk, actual Diretur Jeral SEJD, Metodio Caetano Moniz inform katak, seremonia tomada de posse ne’e hanesan formalitas deit para atu serteza ba funsiunarius públiku ne’ebé mak hetan konfiansa hodi assume kargu de xefia iha instituisaun ne’e hodi hatudu vontade servisu ba Povu Timor Leste.

Eis insperot jerl SEJD ne’e aumenta liu tan kaatak, ho juramentu ida ne’e hanesan komitmentu ida para fortifika kada xefia kargu ninia-án, nune’e ba oin xefia kargu foun sira labele haluha ninia knar, i kontinua didika ninia-án ba públiku no liliu ba area dezenvolvimentu Joventude Timor Leste. Ito

Jornal Nacional