VETERANUS MILITAR 27 REFORMA, LERE : “TENKE SAI EZEMPLU DIAK”

Xefi Estadu Maior Falintil Forsa Defeza Timor Leste (F-FDTL), Major General Lere Anan Timur husu ba veteranus reformadu militar F-FDTL hamutuk na’in 27 simu subsidiu husi Governu, tenke uza ho didiak para sai ezemplu diak iha publiku nia leet.

Veteranus  reformadu militar F-FDTL refere simu subsidiu husi Ministeriu Defeza (MD), no subsidiu ba kada ema ida ho valor orsamentu US$ 15.000 mill.

“Ha’u husu imi atu kuidadu imi nia saude didiak, no tenke sai ejemplar domin nian iha komunidade ninia leet,”Major General  Lere Anan Timur deklara ba Jornalista iha Kuartel Geral F-FDTL, Fatuhada-Dili, Segunda (11/07/2016).

Major General Lere husu ba veteranus sira refere atu uja didiak subsidiu hodi kuida familia, tanba idade katuas ona, no kontribuisaun ba nasaun bo’ot tebes, e ohin loron responsabilidade bo’ot ba familia.

Iha biban ne’e Lere husu mos ba veteranu sira ne’ebe mak hakarak mete partidu politiku karik koalia sukat ibun, sé lae ema seluk bele kondena fali sira.

Iha fatin hanesan Ministru Defeza (MD), Cirílo Cristovão husu ba veteranus sira ne’ebe simu subsidiu husi Governu uja osan subsidu hodi halo investimentu ba oan sira nia eskola, tanba nasaun ne’e atu hetan respeita husi nasaun seluk presija ema matenek.

“Ha’u husu atu ita bo’ot sira uja osan ne’e hodi halo investimentu ba oan sira nia eskola la bele uja fali ba buat seluk, tanba atu dezenvolve nasaun ne’e presija ema matenek,”haklaken ministru defeza.

Nia hatutan, husi orsamentu ne’e bolu orsamentu reintegrasaun annual tinan 2017 hanesan subsidiu Governu tau dala ida deit ba veteranu reforma sira ne’e, kada ema ida hetan rehun US$ 15.000.

“Ita bolu subsidiu reintegrasaun ba ita nia veteranu sira ne’ebe mak tama ona ba reforma hamutuk nain 27, ema ida rihun US$ 15.000 mill no simu dala ida deit,”esklarese Cirílo Cristovão.

Entertantu, reprezentante veteranu reformadu, Afonso de Jesus “Sanis” afirma liu tan katak, maske reforma ona husi militar, maibe sira kontinua kumpri ordem husi sira nia komandante.

“Ami firmi nafatin ba ordem ami nia komandante sira nian, no ami sei uja osan ne’e ba ami nia oan sira nia eskola,”realsa veteranu Sanis. Eus

Jornal Nacional