TL PARTISIPA JORNADA MUNDIAL JUVENTUDE

Ohin,  Sesta  (15/7) reprezentante  juventude  igreja  katólika  lori  dezeñu Papa João Paulo II ba tuir jornada mundial juventude peregrino ba dala XXXI iha Cracôvia,  Polónia.

Razaun fundamental foinsa’e Timor lori dezeñu Papa João Paulo II wainhira vizita TL no halo misa iha Tasi Tolu  loron (7/9/1989) ne’e, hodi bele  halo  foinsa’e  sira  nia  moris  haksolok  liu tan  no  sira  bele  halo  ema  seluk  sai  ksolok, tamba  sira  nia  sasin  iha  dalan  mizerekordia.

Jornada mundial juventude hahu iha loron 25 to’o 30 no partisipa husi Papa Francisco XVI ho programa prinsipal reflete Papa João Paulo II nia mensagem ba juventude.

Tantu reprezentante foinsa’e ne’ebe ba partisipa iha jornada ne’e hamutuk nain 46, ne’ebé mai husi diocese Dili, Baucau no  Maliana.

Vigariu episcopal ba asuntu pastoral Diocese Baucau  no nudar reprezentante prezidente konferensia episkopal Bispu  Diocese Baucau, Padre Arlindo Sequeira informa, papa  João  Paulo  II  ne’e nudar santo ida ne’ebé protagonista  paz  ba  Timor. Tanba Timor  nia  luta  ne’ebé  durante  Timor  halo  ne’e  só  vizita  santo  ida  ne’e  mak  foin  fó  naroman  no  fó  esperansa  ba  paz  Timor  nian.

“Hau  hanoin  ita  sei  kaer  nafatin  ninia  mensagen  ne’ebé  nia  fó  iha  Tasi  Tolu  katak, joven  mak masin  no  naroman rai ne’e ninian. Hau  hanoin  ita  ida-idak  sai  masin  no  naroman  ona, tamba  imi  ba  ne’e  esperiensia  religiosa  ne’e  makas, dehan Padre Arlindo  Sequeira iha nia homilia wanhira  prezide misa agradesementu ba juventude nain 46 ne’ebe atu ba Polónia, iha kapela Papa João  Paulo II  Tasi-Tolu  Kinta  (14/7).

Nia husu ba foinsa’e nain 46 ne’e atu hatudu identidade katóliku  Timor  nian  iha  miliares  juventude  ne’ebé  sei  halibur  iha  ne’eba no lori  Timor nia bandeira  RDTL  hodi  tata  iha  ema  nia  le’et, tamba  ida  ne’e  hanesan  promosaun  nasional  ne’ebé  Timor  halo atu  ema hare no koñese Timor.

Iha parte seluk, prezidente komisaun organizadora  peregrinos Timor Leste ba jornada mundial juventude iha Cracôvia, Padre Natalino Gusmão Amaral akresenta,  programa ne’e igreja nivel mundial  mak halo ba foinsa’e  sira iha mundu rai klaran, ne’ebé kuaze ema 2 milhoes  mak  sei halibur  malu  iha rai Polónia.

Nia haktuir, Papa  João  Paulo  II  nia  mesagen  foti  husi  evangelho são Mateus  kapitulu  5, versikulu 3  ne’ebé  koalia  konaba,  rahun  diak  ba  ema  sira  ne’ebé  moris  iha  hahalok  mizerekordia  nian, tamba  sira  mós  sei  simu mizerekordia  husi  nain  Maromak.

Iha  tema  ne’e, Papa  João  Paulo  II  dezafia  foinsa’e  sira  katak, foinsa’e  sira  mak sai hanesan ajente  prinsipal  ba  testamunha  konaba  mizerekordia no Papa  hakarak  reflete  hamutuk  ho  foinsa’e  sira  iha  mundu  rai  klaran  katak,  iha  mizerekordia  ne’e  bele  halo  foinsa’e  sira  nia  moris  haksolok  liu tan  no  sira  mós  bele  halo  ema  seluk  sai  ksolok, tamba  sira  nia  sasin  iha  dalan  mizerekordia.

Tantu Vise Ministru Negosiu Estranjeirus no  Kooperasaun,  Roberto  S. de  O. Soares dehan, sira  la’o  laos  ba  pasiar  de’it, maibé  asume  mós  misaun  ida  ne’ebé  reprezenta  povu  Timor.

 “Ami  ba  laos  la’o  de’it, maibé  asume  mós  misaun  ida   ne’ebé  reprezenta  povu  Timor  hanesan  embaixadores  ne’ebé  atu  aspira  ba  mundu  ho  bandeira  RDTL  ho  bandeira  esperitual, nudar identidade  hanesan  povu  Timor  ne’ebé ejiste ho nia karakteristika espesial iha nia relasaun  ho Papa  João  Paulo  II, dehan Roberto.

Tantu juventude nain 46  sei aranka ohin Sesta  (15/6) ba liu  Polonia, Borsoa  no  sei  ba  tuir  atividade  durante  semana  ida  hanaran  Dias  na  Diocese ne’ebé  sei  hamutuk  ho  peregrino  husi  nasaun  seluk  hodi  fahe  esperiensia  ba  fe, povu  no  juventude  rai  Polonia  nian  oinsa  moris  iha  fiar  hanesan  mós  ita  nia  juventude  sira  nia  luta  ba  moris  iha  fiar.

Orsamentu ba partisipa selebrasaun jornada mundial juventude  peregrino  ba  dala  31  selu  rasik,  maibé  iha mos apoiu husi  Sekretariu  Estadu  Juventude  Desportu  ho osan $ 37 mil hodi ajuda juventude  husi munisipiu Same, Viqueque, Liquiça no  Dili.Tos

Jornal Nacional