ORSAMENTU RETIFIKATIVU ATU SELU TUSAN…?!!!

Jornal Nacional, editorial

Parlamentu Nasional aprova proposta Orsamentu Retifikativu 2016 ho motante 390,7 milões nebe atu finansia ba mega projetu tolu, projetu Portu Tibar , Projetu Tasi mane ho projetu drainajem iha sidade Dili, inklui mos selu tusan nebe governu iha ho kompanhia sira durante nee.

Maske debate ba Orsamentu Retifikativu nee lao makas teb-tebes maibe ikus mai deputado sira obrigadu vota a favor ba OR nee ho hanoin ida katak osan sira nee atu uza ba desenvolvimentu hodi fo benefisia ba povu.

Ho aprovasaun Orsamentu Retifikativu US$390,7 milhoens hatudu katak Orsamentu Jeral Estadu 2016 nian biliaun $1.562 nee hanesan mos Orsamentu Jeral Estadu tinan 2015 ho motante biliaun $1.570, difrensia nebe ladun signifikativu.

Agora duvida mak Orsamentu Jeral Estadu tinan 2016 nebe aprova iha inisiu tinan 2016 nian nee la too hodi nunee governu husu tan osan deputadu sira? ka projetu sira nebe atu halo ho OR nee projetu foun nebe latama iha programa orsamental 2016 nebe aprova iha inisiu tinan 2016 liu ba?

Iha dadus balu nebe sosiedade sivil fo sai katak despeza projetu drainajen iha Dili laran projetu Suai supply Base nia orsamentu aloka kada tinan. No iha alokasaun OR 2016 governu kontinua proposta orsamentu 300 miloens liu hodi finansia ba kapital desenvolvimentu hodi finanisia ba projetu tasi mane, drainajem no projetu Tibar.

Pior liu tan eszekusaun orsamentu tinan fiskal 2016, ezkusaun ba kapital desenvolvimentu tokon 347,755 foin ezekuta too 27 porcento, nunee mos Orsamentu imprestimu ba fundu desenvolvimentu infra-estruktura tokon $15,128 foin ezekuta too 6 porcento, nee hatudu katak kapasidade ezekusaun governu nian minimu teb-tebes, maibe governu osan laiha hela deit hodi halo orsamentu retifikativu para husu legaliza votus parlamentu nian.

Hakarak ka lakohi, simu ka lasimu parlamentu nasional aprova no votus unanimidade ‘maioria deputado’ hein deit haruka ba Presidente Republika atu promulga hodi tama iha viogor ‘ ezekusaun’.

Agora kestaun seluk mak OR nee laos finanseia deit mega projetu tolu nee maibe mos osan balu hodi selu tusan. Tan nee mak Parlamentu nasional tenki halo fiskalizaun didiak atu bele haree no kontrola tusan nee hira?  Projetu saida deit? No kompanhia nee se?

Atu selu tusan, laiha problema, importante mak tenki kontratu sira nee iha ordem trabalho, projetu tenki tuir dezenhu tenki no presu projetu tenki tuir BOQ governu nian, laos BOQ nebe kompanhia rasik mak halo hodi aumenta presu tuir gostu.

Ne’ebe, kometimentu governu nian atu lakohi iha tusan hodi fo todan ba governu eleitu 2017, nee diak, maibe la signifika governu selu tusan nee taka matan deit, verifika didiak.

Nunee mos kompanhia sira halo obra estadu nian, laos laiha orientasaun, asves governu foin koalia deit, kompanhia sira halai uluk ona sukat tun sukat sae, halo dezenhu, BOQ. Kompanhia balu governu seidauk haruka sira ba halo ona hotu ona, depois halo invoice obriga governu selu.

Ne’e problematiku duni, nebe pretenete duni atu Parlamentu Nasional kria komisaun eventual atu bele akompanhia, fizkaliza projetu sira nee, parte Tribunal Rekursu mos tenki haree didiak motantes osan nebe selu ba projetu sira nee.

Ne’ebe parabens ba Parlamentu nasional nebe aprova ona Orsamentu retifikativu, agora resposabilidade tenki fikaliza didiak atu nunee governu labele gasta osan estadu nian arbiru. *