Aderito Hugo: Ka’er Metin Disiplina

DILI, (ANTIL) - Prezidenti Parlamentu Nasional, Aderito da Costa Hugo konsidera instituisaun Forsa Defesa Timor-Leste nia origin mai hosi FALINTIL, tanba ne’e Forsa Defesa Timor-Leste (FDTL) tenki ka’er metin disiplina hanesan FALINTIL sira hatudu iha tinan 41 liu ba.

“Loron 20 Agostu loron importante ba povu Timor-Leste tanba iha loron ida ne’e iha tinan 41 liu ba timor oan sira hamrik reafirma sira nia pojisaun hodi fo apoiu ba desijaun Komite Central FRETILIN kona ba Insurisaun Jeral Armada iha Aiseremu, hodi harii forsa ba libertasaun ho isperitu patriotism no nasionalismu aas,” Aderito Hugo afirma iha nia diskursu official iha komemorasaun loron FALINTIL, 20 Agostu foin lalais ne’e.

Hugo dehan, FALINTIL iha tinan 41 liu ba hamrik metin hodi defende rai Timor hosi invasor sira ne’ebe mak hetan apoiu hosi mundu ida hatudu duni FALINTIL mak lutu no liman kroat povu nia hodi defende Timor oan sira.

“Ne’e signifika Forsa Defesa Timor-Leste nia origin mai hosi FALINTIL,” Aderito Hugo esplika tan.

Hodi husu ba forsa defesa Timor-Leste sira ka’er metin ba mandatu ne’ebe mak konstituisaun fo atu defende no salva guarda Republika Demokratika Timor Leste ho disiplina no submete ba hirarkia instituisaun.

Jornalista: Manuel Pinto / Editor: Gantry Meilana

Foto: Prezidenti Parlamentu Nasional, Adertito Hugo akompainha hosi komandante Parada hodi halo pasa revista ba parada antes hasa’e bandeira iha komemorasaun loron FALINTIL dala-41 iha Edifisiu Ministeriu Defesa Fatuhada, (20/08). FOTO ANTIL