PN ESPERA BRI FO KREDITU HO JURUS KI’IK

Bank Rakyat Indonesia (BRI) nudar instituisaun finanseira ne’ebé foin estabelese iha Timor Leste bele halao nia knar diak liu tan hodi fasilita kreditu ba povu ho jurus ne’ebé ki’ik.

Reprezentante povu iha uma fukun Parlamentu Nasional (PN) husu ba BRI  atu bele fo biban diak ba povu ki’ik sira atu asesu kreditu.

“Hau hakarak hato’o parabens no benvindo mai Timor, ne’e hanesan kompetisaun ida ne’ebé mak diak, atu nune’e la bele prejudika malu no mos fo kredit ba povu ho jurus rasional,” hateten membru PN husi Bankada CNRT, Arão Noe de Jesus, hodi responde JNDiario iha PN, Kinta (16/3/2017).

Felismente, banku komersial husi estranjeirus ne’ebé halao atividades finanseiru iha Timor Leste fo jurus ne’ebé boot, provolta 15% to’o 20%. Tanba ne’e, reprezentante povu nian iha PN espera BRI bele halo balansu ba ativisdade finanseira iha TL, liu-li fasilita kreditu ba povu ki’ik sira.

Deputadu Arão Noe de Jesus, konfirma katak, ho prezensa banku komersial estranjeirus iha TL hatudu progresu ekonomia povu TL nian hodi garantia sira nia atividades investimentu.

“Iha Timor iha deit banku BNCTL mesak, sira seluk mesak banku internasional, ne’e signifika katak Timor komesa dezenvolve ona, li-liu iha area ekonomia ninian,” hateten Deputadu Arão Noe de Jesus.

Instituisaun finanseira estranjeirus ne’ebé ejisti tiha ona iha TL, mak hanesan Banco Nacional Ultramarinho (BNU), ANZ ho Bank Mandiri. Maibe, durante ne’e, ladun fo oportunidade boot ba povu TL atu asesu kreditu.

Iha fatin hanesan Deputado bankada FRETILIN, Manuel Castro, hateten katak, prezensa BRI nian diak tebes atu bele ajuda halo kresimentu ekonomia iha Timor.

“Hau husu ba banku sira kuandu halo ejistensia iha ne’e tenke fasilita kreditu ba iha negosiante sira ho jurus ne’ebé ki’ik,” hateten Deputadu Manuel Castro.

Manuel Castro suzere ba Governu, liu-liu Banco Central Timor Leste (BCTL) atu hala’o nia funsaun regulador ho diak, nune’e bele tau atensaun ba ejistensia banku estranjeirus nian, oinsa bele fasilita kreditu ba Timor oan.

“Tanba agora dadauk Timor iha ona banku hat, ne’ebé hau husu atu Governu fo atensaun, hodi nune’e sira bele jere sira nia banku ho diak para fo benefisiu ba iha povu ki’ik sira,” tenik Manuel Castro.

Manuel Castro husu mos ba Goveru atu tau kriteria ne’ebé maka diak ba iha banku sira ne’e, no banku sira mos tenke obedese ba kriteria hirak ne’e para bele fasilita diak liu tan.

Informasaun ne’ebé Deputadu Manuel Castro hetan husi Camara Comerçio no Industria Timor Leste (CCI-TL) katak, to’o ohin loron banku ne’ebé mak iha ona Timor seidauk fo kredit boot ba iha Timor oan sira, maibe iha parte seluk emprezariu Timor oan balun mos halo tiha kreditu iha banku sira ne’e mas la kumpri sira nia dever no komprimisiu kreditu. Ho nune’e, prezodika mos ema seluk no povu ki’ik sira atu hetan oportunidade ba fasilidades kreditu husi banku sira ne’e.mia

Jornal Nacional Diário