TRABALLADOR 161 LAKON SIRA NIA SERVISU

DILI - Sindikatu Jeral Traballadores Timor Leste (SJT-TL) konsidera kompañia Gardamor viola lei traballu, tanba  halo demisaun ba Traballador na’in 161, la fó kompensasaun.

Traballador  security  161 ne’ebé kompañia Gardamor  demiti, mai hosi lokasi 10, kompostu lokasi Patrimoniu de Estadu Balide (Alfa 226 no 227), Lokasi Estatistik Dili (Alfa 228), Patrimoniu de Estadu Farol (Alfa 231), Lokasi Armagem Bebora (Alfa 230).

Iha mós Lokasi Patrimoniu Estadu Tasi-Tolu (Alfa 232), Lokasi Patrimoniu Obrigado Barak (Alfa 229), Lokasi Patrimóniu Estadu Liquica, Lokasi Patrimoniu Estadu Baucau, Lokasi Jacson Lay (Alfa 94) no Lokasi Timor Post (Alfa 104), ho totál trabalhadores 161  pessoas.

Tuir keixa ne’ebé SJT-TL simu hosi Traballador Security sira, katak maoria sira nia kontratu sei termina iha Fulan dezembru tinan 2016, maibé sira lamenta tan, kompañia gardamor hapara sira la fó kompensasaun. Ho rajaun sira nia kontra ho Kompañia seidauk termina.

SJT-TL konsidera asaun kompañia Gardamor demiti trabalhadores security 161  ne’e, hanesan problema seriu ida,  tamba rezulta traballador barak mak lakon sira nia servisu, konserteza mós sei afeita ba sira nia situasaun ekonomia iha sira nia familia.

“Ami husu ba ita bo’ot atu konsidera problema ne’e ho seriu, nune’e ita bo’ot ho laran kma’an marka tempu ba ita bo’ot nia a’an rasik hodi hahu deskute ona ho ami ba problema ne’e tuir Lei No.4/2012. Tan asaun demisaun Kompañia halo viola lei trabalho, tan ne’in fó kompensasaun ba traballador sira, Informa  Sekretario Jeral SJT-TL, Almeiro Vila Nova ba Jornalista iha nia servisu fatin, Kinta (18/08).

Almeiro hatete, kompañia Gardamor hakotu reasaun servisu ho trabalhador Sicuranca sira iha loron 13 Agosto tinan ne’e. Altura ne’ebé iha kedan asaun grave spontanitas hosi traballador iha lokasi Lokasi Estatistik Dili (Alfa 228), kaikoli nian. Nune’e ikus SJT_TL organiza maluk traballador sira ne’e hodi hatene sira nia servisu.

“Ami  ejiji ba Kompañia atu selu salariu ba trabalhador iha fulan Augustu ni’an to’o kontratu hotu. Selu indiminizasaun ba trabahadores sira, selu subsidi annual ba trabahadores sira,. Ami husu ba kompañia Gardamor atu selu kompensasaun tamba tempu servisu, tuir artigu 56, ba trabalhador sira nebe’e hala’o kna’ar kada periodu tinan Lima (5),”ejiji SJT-TL.

Tuir lei númeru 4/2012 alineia 15  katak, molok kompañia hasoru problema iha estrutura, Finansas, ekonimia, kompaÑia labele hapara kedan kontratu servisu ho trabalhadores sira. KompaÑia tenke halo esforsu atu redus salariu ba traballdor sira, mais ne’e laiha, kompañia hapara kedan sira. Ne’e hatudu kompañia viola lei traballadores.

Hatán ba prekupasaun SJT-TL, Diretór Ezekutivu Gardamor, Eduardo Belo Gatot hatete, loos duni iha trabalhadores 161 maka kompaña hapara hosi servisu.

Eduardo hatete, desizaun hapara traballador sira ida ne’e la’ós  kompañia nia hakarak maibé desizaun ne’e mai hosi Ministeriu Finansas (MF).

“Ne’e la’ós  tan kompañia nia hakarak, Mais redusaun ne’e mai hosi Ministériu Finansas  rasik. Tan ne’e empreza hanesan parseiru ho Ministériu Finansas. Tan ne’e redusaun kompañia halo bazeia ba pedidu hosi Ministériu Finansas nian,”hatete  eduardo.

Tuir nia,  antes ne’e, traballadores besik atus rua maka hala’o siguranca ba edifisio  Ministériu Finansas ho nia instalasaun sira. Maibé  agora MF maka husu kompañia halo redusaun ba numeru Traballadores, entaun Kompañia tenke kumpri.  

Eduardo hatutan, Kona-bá kompensasaun nia termu luan tebes, bainhira kompañia hapara sein rajaun, laiha buat ida, mais ne’e kompañia hapara tanba ministério Finansas maka husu nune’e kompañia tenke kumpri.

“Mais agora trabalhadores 161 ne’ebé kompañia para, 20 resin mai simu ona sira nia annual bonus.  Hanoin sindikatu mós hatene. Ne’e sira nia direitu. No trabalhadores balun mai tau naran ona, hein kompañia prepara servisu ba sira. Tan ne’e, Na’in ba kompania husu ba sindikatu sira atu kopera ho kompañia atu buka dalan rezolve problema ne’eb’e traballador sira infrenta,”responde Eduardo.

SJT-TL La simu Jurídiku

Portantu parte SJT-TL tenta beibeik ona atu hasoru nain ba kompañia gardamor maibé, nain ba gardamor haruka nia asesor juriku maka ba hasoru ho SJT maibé parte SJT lakohi simu ho razaun asesor jurídiku la’ós  nain ba kompañiahodi foti desizaun.

“Agora dadaun SJT-TL halo aprosimasaun ho nain kompañia Gardamor, tan tuir sindikatu problema ne’e resolve bainhira na’ain kompañia tur hamutuk ho sindikatu hodi resolve,”hatete Almeiro.

Kona-ba kestaun ne’e, Tuir Eduardo hanesan nain ba kompania hatete, loloos parta sindikatu tenke simu sira nia asesor hodi resolve kestaun ne’e tanba kmpañia rasik iha nia asesor jurídiku ne’ebé iha koñesementu kle’an ba lei.

Ba ha’u saida maka ha’u  nia asesor legál sira foti, ha’u kumpri, nusa maka sindikatu lakohi. Tan ne’e ha’u nafatin husu ba maluk sindikatu sira atu tur hamutuk hanesan Timor-oan hodi solusiona lalais problema refere,” hatete Eduardo.

Kona-ba ameasa greve, tuir Eduardo, asaun greve la’ós  solusaun maibé importante liu maka simu malu hodi rezolve problema ne’e.(max)

Timor Post