Timoroan 20 Tuir Formasaun Ekipamentu Pezadu iha Xina

DILI, (ANTIL) - Sekretaria Estadu Polítika Formasaun Profisionál no Empregu (SEPFOPE) no reprezentante Embaixada Xina iha Timor-Leste, despede formandus hamutuk 20 ne’ebé atu ba tuir formasaun iha Xina durante fulan tolu nia laran iha área ekipamentu pezadu.

Programa ne’e realiza, tanba kooperasaun entre governu no embaixada Xina. Seremónia despedida ne’e hala’o iha salaun SEPFOPE Kaikoli, Segunda, (15/8).

Formandu sira ne’e maka hanesan José António Martins Manuel, Armando Soares, Gil Maria dos Santos, Pedro Pereira Tilman, Rosito Sarmento de Jesus, Julião Baptista, António Maria Ferreira Alves, Crispim Laurensius de Jesus Ferreira, Gian Pereira, José Mendonça, Hélder Freitas Ximenes, Joaquim Pereira, Nélson Viana Simões, Francisco do Everaldo Neto Nunes, José Exposto Leba, Joel Madeira da Costa, Bernabas Neno Nono, Marcos Seco Nono, Mouzinho Neno, Pedro Maria Soares.

Konsuladu Ekonómika no Komersiál Embaixada Xina iha TL, Liu Zhenhua, ne´ebé partisipa iha seremónia despedida ne’e husu ba formandu sira atu aproveita didi’ak oportunidade.

Formasaun ida ne’e importante tebes, tanba atu eleva formandu sira nia koñesementu para bele fila mai kontribui ba dezenvolvimentu estadu.

Bainhira formandu hirak ne’e la-aproveita formasaun ho di’ak, posibilidade iha futuru Xina sei hapara kooperasaun ne’e.

Nia mós ladun satisfás, tanba entre formandu hirak ne’e feto la-inklui. Atu promove igualdade jéneru, tuir nia, feto sira nia partisipasaun iha área konstrusaun importante tebes. “Iha futuru ha’u sujere SEPFOPE involve mós feto sira iha área ne’e”, nia propoin.

Iha fatin hanesan, Diretór Jerál Formasaun Profisionál no Empregu, Paulo Alves, reprezenta SEPFOPE, Ilídio Ximenes fó hanoin ba formandu sira atu fó ulun ba formasaun maibé la’ós atu ba pasiar.

Nia husu atu formandu sira kumpri regra formasaun ninian nune’e bele asegura formasaun sira iha futuru kontinua la’o.

“Imi apriende didi’ak para fila mai fó kontribuisaun ba nasaun joven ne’e”, nia informa. Hodi hatutan, agradese ba embaixada Xina, tanba bele fasilita formasaun refere.

Tinan uluk, kooperasaun entre SEPFOPE no embaixada haruka uluk ona formandu sira hamutuk ema na’in 30 ba tuir formasaun iha área ne’ebé hanesan (konstrusaun). Formandu 20 ne’e sei aranka iha Tersa, (16/8) aban. Sira viajen hosi Dili-Singapura no Singapura-Xina. (jornalista: Xisto Freitas; editora: Rita Almeida)

Foto: Formandu sira hasai foto hamutuk ho Diretór Jerál Formasaun Profisionál no Empregu, Paulo Alves ho nia staf sira no mós Konsuladu Ekonómika no Komersiál Embaixada Xina iha TL, Liu Zhenhua, hafoin remata seremónia despedida. Foto ANTIL/Xisto Freitas