Governu Laiha Vontade Hodi Realiza Eleisaun Suku

DILI – Relasiona prolongamentu data eleisaun xefe suku nian neebe mak monu iha loron 29 Outobru 2016, observador politika konsidera katak Governu laiha vontade.

Tuir Observador Politika-UNTL, Camilio Ximenes Almeida hatete katak, eleisaun xefe suku uluk Governu marka ona data monu iha loron 30 fulan Setembru, ikus mai Governu rasik halo mudansa nee signifika laiha vontade hodi realiza eleisaun xefe suku.

Kestaun ida neebe mak importante sosiedade tenke hatene koanaba eleisaun xefe suku nian, Governu laiha vontade diak hodi realiza eleisaun xefe suku nian,” dehan Camilio ba jornalista iha kampus-lama-UNTL, Caicoli-Dili, Segunda (19/09/2016).

Camilio haktuir, razaun Governu laiha vontade tanba mandatu xefe suku nian iha tinan 5 deit, maibe too kedas iha tinan 6 mak foin halo eleisaun xefe suku hodi troka. Camilio afirma, agora deit atu halo eleisaun xefe suku nian sira halo mudansa tun sae, sira (Governu) mai ho argumentu katak seidauk bein preparadu entaun CNE no STAE nee halo saida.

Iha sorin seluk, Deputadu Komisaun A trata asuntu lei konstituisaun no poder loka, Arao Noe dehan, haree husi promulgasaun lei xefe suku nian entre no vigor tempu lasufisiente ba STAE atu prepara dokumentus no materias ba eleisaun nian no haree mos kondisaun no preparasaun iha tereinu. Informasaun kompletu iha STL Jornal no STL Web, edisaun Tersa (20/9/2016). Raimundo S. Fraga

Suara Timor Lorosae