Povu Viqueque Husu PR Taur Kontinua Kandidata Aan Ba 2017

OSSU- Povu Suku Liaruca, Postu Administrativu Ossu, Munisipiu Viqueque triste, tanba mandatu Prezidenti Republika (PR), Taur Matan Ruak besik remata. Tanba Xefi Estadu durante kaer ukun, hakbesik aan ba povu no hadomi povu, needuni sira husu atu kandidata aan dala ida iha 2017, para tau matan ba povu nia moris.

Tuir Komunidade Suku Liaruca Agustinho da Costa husu ba Prezidenti Republika (PR), Taur Matan Ruak atu kandidata an fali ba Prezidenti Republika iha tinan 2017, tanba Taur Matan Ruak mak hadomi liu povu.

Ami triste tanba ita boot nia mandate besik remata ona, tanba nee, ami husu atu Prezidenti Repblika bele kandidata aan fali ba Prezidenti Republika, hodi tau matan ba povu, tanba ita boot deit maka hanoin povu no tau matan ba povu nia moris, ami tauk ema seluk maka sae fali ba prezidente bele hadomi ami pou hanesan ita boot hadomi ka lae, tanba nee maka ami triste, neduni hami husu ita bot tenke kandidata aan hodi kaer ukun iha periodu ida tan,” dehan Agustinho ba Xefi Estadu nee, liu husi dialogu komunitaria ho povu iha Suku Liaruka, Kuarta (14/09/2016).

Entertantu Komunidade Suku Liaruca Eugenio Saldanha mos hatete, Prezidenti nia mandatu atu hotu ona, oinsa ho Prezidenti Republika nia moto neebe hatete, uluk ho imi fakar ran ba ukun rasik aan, fila fali ho imi, hisik kosar ba moris diak, tanba povu seidauk hetan moris diak.

Hatan konaba preokupasaun nee, Prezidenti Republika (PR), Taur Matan Ruak dehan, nia sei la kandidata aan ba Prezidenti Republika.

Hau lakohi kandidataan ona, mas hau sei nafatin ho imi para servisu ba Timor nee, tanba hau mos terus ba rai ida nee, hau husu obrigadu ba imi tanba hili ona hau hanesan imi nia Prezidenti,” katak Xefi Estadu.

Xefi estadu nee mos haklean tan katak povu maka foti no hatun Prezidenti, tanba nee, povu rasik  maka sei foti fali Prezidenti foun iha 2017, maibe ba nia lakohi ona kandidata aan, maibe nia kontinua hare fali serbisu seluk halo hodi azuda nasaun no povu ida nee ba oin. Informasaun kompletu iha STL Jornal no STL Web, edisaun Tersa (20/9/2016). Joao Anibal

Suara Timor Lorosae