Kompanhia Malandru ANPM Taka Nagarjo no Suspende Estasaun Mina Tolu

DILI - Autoridade Nasionál  Petrólium i Minerais (ANPM) suspende temporáriamente postu abastesimentu konbustiveis tolu iha Dili laran, hanesan Queen Fuel, Belak Fuel, Lafaek Bal Fuel, tanba la kumpri rekejitus ne’ebé iha.

Alein de ne’e, Prezidente ANPM, Gualdino da Silva, informa, nia parte taka permanente postu kombustel ho naran Nagarjo tanba harí besik ho postu kombustivel seluk ne’ebé harí uluk tiha ona la to’o kilo-metru ida, iha Práia dos Cuqueiros, Dili.

“Kundu sira (Estasaun Mina tolu ne’ebé taka provizóriu-red) priense fali rekejitus hotu bele loke fila-fali, maibé Nagarjo maka ami taka tanba harí distánsia hosi ne’ebé iha tiha ona, ne’e menus hosi kilometru ida ne’e maka la autoriza,” Gualdino ba jornalista sira iha nia servisu fatin, Palásiu Governu, Dili, Tersa (13/9).

Gualdino subliña, regulamentu tékniku ne’ebé ANPM fó ba kompañia sira dadaun ne’e atu eduka oinsá maka hotu-hotu bele hala’o nia atividade iha nasaun ne’e tuir lolo’os nia dalan. Hirak ne’ebé provizoriamente taka ne’e tanba dala tolu ona ANPM halo notifikasaun maibé laiha resporta.

“To’o tenpu ruma maka sira kopera ona atu bele  aplika tuir prosesu para atu hetan fali lisensa ne’e bele loke fila-fali, maibé agora ami tenke foti duni desizaun administrativu ida ne’e atu bele lori ita nia maluk sira ne’e ba iha prosesu ida para sira bele adere ba iha rekrementus ne’ebé  maka iha atu bele trata no prosesa ba lisensa, atu nune’e ita bele serví ita nia povu ne’e tuir regulamentu ne’ebé  maka iha no tuir estandar ne’ebé  maka aplika hosi ita nia governu no mos hosi regulamentu tékniku  ne’ebé  maka ANPM fo sai,” subliña Gualdino.

Prezidente ANPM ne’e haktuir, postu abastesimentu kombustiveis iha Dili laran hamutuk 23.

“Ita haré katak lubuk ida maka konsege hetan ona lisensa, no adere ba rekezitus ne’ebé  maka iha, maibé balun ita ba notifika la iha resposta ruma entaun ita tenke fo sansaun,” Gualdino hatutan.

Lisensa espesifikamente atu loke Postu Abastesimentu Konbustiveis ne’e presiza komprende kona ba rai ne’ebé  maka sira uza ne’e halonusa no nia inpaktu ba ambiente ne’e halo nusa no nia dezeina sira oinsa ne’e tenke  tuir rekesitus sira ne’e para labele fo inpaktu ba iha fatin refere.

“Iha partisipasaun timoroan ka la’e no ema sira ne’e tuir treinamentu ka la’e, buat sira ne’e tenke haré  hotu, tanba ne’e maka ami fo notifikasaun depois halo notifikasaun to’o dala tolu maka la iha resposta entaun presiza asaun administrativu maka ami foti, atu nune’e iha Dili laran ne’e pelumenus kompañia  hotu-hotu ne’ebé  maka iha operasaun ba iha postu abastesimentu konbustiveis tenke tama ona iha sistema ne’ebé  maka estabelese,” Gualdino hatutan tan.

Iha fatin hanesan Diretór  Downstream, Nelson de Jesus, hatete, suspensaun postu abastesimentu konbustiveis ne’e nia durasaun ne’e depende ba kompañia  nain sira kundu halo prosesu lais no hatama dokumentus lais entaun ANPM fo lisensa hodi loke fali.

Nelson haktuir, prosesu sira ne’e la’o  komesa iha tinan 2012 bainhira dekretu lei númeru  1/2012 kona-ba seitór  downstream ne’e iha komesa bolu ona maluk kompañia sira atu hatan ona nia dokumentus, depois ida ne’e hetan tiha aprovasaun ba regulamentu tékniku  kona-ba harí  no opera postu abastesimentu konbustiveis iha tinan 2013.

“Ita konta hosi tinan 2012 to’o 2016 ne’e tinan hira tiha ona tanba ida ne’e ita konsege iha Dili postu abastesimentu konbustiveis maka hetan ona lisensa, no iha Munisipiu hanesan Suai, Liquisa, Baucau, Manatutu, Aileu sira ne’e ida-ida hetan ona lisensa, entau iha Dili ne’e besik hela maka labele mai kumpri rekezitus sira ne’e labele,” afirma Nelson.

Entretantu, Manajer kompañia Queen Fuel, Cristina Correia, rekoñese nia parte seidauk kompleta dokumentus, maibé oras ne’e dadauik sira halo esforsu ona preparasaun atu husu ba ANPM fó fali lisensa ba sira nia atividades.

“Sira haruka ami taka ne’e los duni tanba ami nia dokumentu maka la kompletu duni no sira fo tenpu ami ne’e to’o fulan tolu atu prepara. Ami sente katak sei la to’o fulan tolu ami hatama ona ami nia dokumetus sira ne’e para ami bele loke fali ami nia postu abastesimentu konbustiveis,” Cristina ba Timor Post iha nia kna’ar fatin.(mj4)

Timor Post