ESKOLA PRIVADU, VITIMA BA MERENDA ESKOLAR

Membru Parlamentu Nasioanal (PN) Deputada Josefa Pereira lamenta ho programa mereda eskolar ba eskola privadus sira tanba atraza i halo labarik sira sai vitima ba direitu nebe aprova ona iha PN konaba merenda eskolar.

“Hau lakoi intervere iha jestaun mekanismu komisaun nebe hanaran an CONETIL nebe estabelese duni ho konkordansia Governu nian hamutuk ho Igreja atu hare kona ba jestaun merenda eskolar, embora komisaun ne’e hari ona maibe ita kontinua observa implementasun merenda eskolar iha eskola privada nafatin atraza i halo labarik sira sai vitima ba direitu nebe ita aprova ona iha PN, mosu perguntas mai hau, saida maka akontese iha CONETIL ne’e ou iha ema seluk maka intervere iha laran ou inkapasidade husi CONETIL ne’e,” hateten Deputada Josefa Pereira  iha PN, Segunda (10/10/2016).

Nia hatutan, tuir lolos labele intervere maibe iha asuntu nebe importante, koalia kona ba direitu labarik nian, exemplu hanesan akontese iha Remisiu eskola privada no eskola publiku distansia la dok malu, ida iha estrada sorin no ida iha sorin. Maibe, eskola privada tenki asisite deit wainhira eskola publiku sira iha merenda eskolar.

“Bele mosu pergunta iha labarik sira nia laran tanba sa hau lahan hau nia merende hanesan sira, tanba sa mosu tratamentu desigual entre eskola publik ho eskola privadu liu liu iha asuntu merenda eskolar, tanba saida?,” haktuir Josefa.

Deputada ne’e espera katak entre Governu ho Igreja tenki iha ko’ordenasaun konstante kona ba asuntu ne’e, labele konsiente katak direitu labarik nian etvioladu tanba deit enjenudade, ida ne’e labele konsente.

“Hau hanoin asuntu ne’e persija hare tanba kada tinan ita aprova osan, tratamentu ne’e tenki igual ba labarik sira iha pais Timor Leste mais tanba saida husi eskola Igreja nian, eskola privadu siempre atraja, se posibel investiga tok komisaun CONETIL ne’e atu hatene tanba sa maka atraza i ate balun la simu,” dehan nia.

Iha fatin hanesan Presidente Komisaun F, Deputadu Virgilho Hornai nebe trata kona ba saude, edukasaun, desportu, igualdade jeneru, joventude no solidaridade sosial hatete merenda eskolar ne’e kada tinan siempre aloka osan ba eskola publika tantu privadu.

“Kona ba eskola privadu hau hanoin persiza husu ba Diocese ida-idak simu osan depois sira maka halo jestaun ba osan verba ida ba merenda eskolar privadu sira, hau hanoin persija halo komfirmasaun ba Diosesa nebe simu osan, tanba sira iha yayasan ida CONETIL nebe maka simu ida ne’e, mais tanba sa maka la lao,” dehan Virgilho. Nes

Jornal Nacional