Profesores Moe Hanorin Materia Saude Seksual Ba Estudantes

Ministerio Edukasaun integra ona asuntu saude seksual iha kurikulum national hodi hanorin estudantes iha esino, maibe seidauk hahu tanba profesores seidauk pronto no moe atu hanorin. 

Vise Ministra Edukasaun, Dulce de Jesus Soares hateten edukasaun seksual la’os disiplina ketak ida maibe komprensivu ne’ebe atu sensibiliza estudantes (feto no mane) kona ba igualidade jeneru, prevensaun isin rua sedu inklui moras hada’et sira liu husi relasaun seksual. 

“Ita iha ona kurikulum, maibe problema tanba profesores barak sente enkomodo no moe atu koalia kona ba sasan sira ne’e ba estudantes,” nia hateten iha konferensia national direitu saude seksual no reprodutivu ho tema “investe iha feto nia saude, investe ba Timor-Leste nia futuru”, iha Delta Nova, Dili.

Tuir nia, materia saude seksual ne’e sei hanorin hahu husi primeiru siklu ensino baziku to’o ensino sekundario, no sei hanorin tuir idade no nivel komprensaun estudantes nian. 

“Presiza hanorin edukasaun seksual ida ne’ebe komprensivu, katak  hanorin kona ba dezenvolvementu humanu, prevensaun moras, abilidade foti desizaun, protesaun no relasaun ne’ebe saudavel no pozitive,” nia hateten. 

Nia dehan, iha kurikulum ne’e akumula hotu informasaun kona ba saude reprodutivu, prevensaun ba isin rua sedu no tipu abuzus sira. 

Nia hatutan, iha materia saude seksual ne’e sei koalia kona ba diferensia seksu, jeneru, unidade organism humanu inklui promosaun saude, nune’e sira iha konesementu no komprende hodi foti desizaun ne’ebe diak no saudavel ba sira nia moris. 

Tanba bainhira estudante sira iha ona konesementu klean kona ba saude seksual, nia hateten kontribui ona ba iha redusaun taxa isin rua sedu, soe bebe, mortalidade inan ho oan no problema sosial seluk tan iha rai laran. 

Alende ne’e, nia hateten profesores mos la kreativu (maneira hanorin) atu oinsa mak atrai partisipasaun ativu estudante nian iha prosesu apredizajen inklui mos laiha abilidade atu transforma informasaun sira kona ba saude seksual ne’ebe klean ba alunus sira. 

Materia saude seksual enkaixa iha kurikulum eskolar nian iha tinan 2015 bainhira ministeriu halo revizaun (implementasaun) ba iha kurikulum nasional.

Iha parte seluk Diretora Fundasaun Alola, Alzira Reis hateten kultura mos sai hanesan obstaklu bo’ot ida ba ministerio atu implementa kurikulum foun ne’e, tanba sosiedade timor mai husi kultura ida ne’ebe koalia kona ba seksualidade ne’e segredu.

Maske nune’e, nia hateten Ministerio Edukasaun labele rende, kontinua esforsu halo aprosimasaun ba iha profesores sira, katak importante atu alunus sira iha konesementu.

“Tanba ida ne’e importante los ba iha labarik sira nia futuru,” nia hatutan.

Nia hatutan, asaun importante ne’ebe ministerio tenke halo mak halo sosializasaun ba iha inan-aman sira atu iha konesementu ba kurikulum, nune’e labele hamosu problema entre profesores no inan-aman. 

Iha parte seluk Vise Prezidente Grupo Feto Parlamentar, Deputada Albina Marçal hateten edukasaun mak save ba iha mudansa hotu liu –liu prevene isin rua no redus mortalidade inan ho oan iha Timor–Leste. 

“Importante tebes integra edukasaun seksual ba iha kurikulum ensino atu sensibiliza ba foinsa’e sira hodi hatene funsaun orgaun reprodutivu sira, ho ida ne’e ita prevene ona isin rua la ho hakarak,” nia hateten. 

Tanba tuir nia, kazu soe bebe ne’ebe akontese iha rai laran ne’e dalabarak kauza husi isin rua la ho hakarak no la preparadu atu sai inan no aman.

The Dili Weekly