VETERANUS VÍTIMA BA PROJETU ELEKTRISIDADE, XANANA: “SIRA MAK HAKARAK DUNI”

Membru Parlamentu Nasional (PN) preokupa tebes ho situasaun ne’ebe mak akontese ba veteranu sira, tanba deit hadau malu projetu maka veteranus balun mos sai vítima.

Membru PN husi Bankada  CNRT, Domingos Carvalho, hatete katak, durante ne’e kompanhia sira mak soran veteranus sira kona ba projetu elektrisidade.

“Hau lamenta teb-tebes ho problemas elektrisidade ne’ebe hodi soran veteranus sira iha munisipiu sira hotu, veteranu sira mak sempre sai vitima ba iha projeto sira ne’e, maibe tuir ami nia observasaun bainhira ami tun ba halo fiskalizasaun iha terenu la’os veteranus maka hadau malu projeto, maibe kompanhia mak soran, veteranu ne’e naran sagradu teb-tebes labele hateten katak veteranus ne’e hadau malu projeto, maibe kompanhia maka buka lukru ikus mai soran veteranus sira,” hatete deputado Domingos Carvalho bainhira aundensia ho ho Ministeriu Obras Publikas (MOP) no Ministeriu Planeamentu Investimentu no Estratejiku (MPIE) iha plenaria, Kinta (27/10/2016).

Ministru Planeamentu Investimentu no Estratejiku (MPIE), Kay Rala Xanana Gusmão, dehan katak, deputadu temi katak veteranus sai vítima, maibe atu dehan katak, sira mak hakarak duni sai vitima.

“Hau konhese kazus barak teb-tebes, la’os kompanhia maka soran veteranus, mas veteranus mak soran malu,” hateten eis Primeiru Ministru ne’e.

Nia hatutan, veteranus barak mak husu projetu, hodi sustenta sira nia familia no haruka oan ba eskola.

“Hau kuandu hase sira katak balu ain at mas hakarak kaer projetu elektrisidade, maibe sira dehan Bapa backing, no sira dehan mai hau katak fo netik projetu ne’e ba sira para sira haruka sira nia oan ba eskola, tanba sira terus mos ba rai ida ne’e, tanba ne’e maka ita hanoin malu ajuda, maibe dala barak ami simu dokumentus katak projetu elektrisidade ne’e ho nia naruk 5 mil metrus, maibe ami tun ba haree la to’o ida,” afirma Xanana.

Lider karismatiku ne’e dehan presija duni iha mudansa ba mentalidade, hodi nune’e bele dezenvolve rai ne’e diak liu tan. “Momentu iha inagurasaun central elektrika Same-Betano, prezidente republika dehan Governu labele fo tan projeto ba…, maibe prezidente fila tiha sira forma mai komprementa hau hodi husu, no hau fila mai Dili kareta hodi dokumentus husu projetu barak teb-tebes, ne’e laiha problema,” dehan Xanana.

Ho problema hirak ne’e, Eis xefi Governu ne’e husu ba deputado sira ne’ebe mak reprezenta munisipiu tur hamutuk ho veteranus, kompanhia sira resolve problema ne’e, labele fo hotu deit ba Governu.

“Hau husu ba deputado sira ne’ebe mak reprezenta munisipiu labele ba rona problema mai levanta deit, maibe tenke bolu kompanhia no veteranus sira ne’ebe mak problema hodi resolve, labele ba rona tiha depois hodi mai ami mak atu resolve, maibe imi nia papel mos ba tur hamutuk ho sira koalia tok, ne’ebe hau husu favor ba ita hotu kuandu problema iha ita nia munisipiu ba buka tok hodi resolve imi mos iha dever hotu,”dehan Xanana. mia

Jornal Nacional