Emilia Pires: Opera Iha Australia, Tratamentu Iha Portugal

DILI: Advogadu privadu hosi arguida Emilia Pires, José Camões hatete, ninia kliente depois halo operasaun iha Australia iha loron 05 Novembru 2016, sei kontinua halo tratamentu iha Portugal.

“Ha'u nia kliente, se desloka ba Portugal hodi kontinua halo tratamentu depois halo operasaun iha Australia,” José Camões informa kestaun ne'e ba jornalista, Kuarta (16/11) iha Tribunál Distritu Dili (TDD).

Tuir José, kondisaun arguida Emilia Pires oras ne'e seidauk rekopera ho di'ak. Tanba ne'e, presiza atu kontinua halo tratamentu iha Portugal.

“Ha'u rasik hatama ona karta ida ba TDD, para tribunál hatene katak ha'u nia kliente sei presiza kontinua halo tratamentu, ba moras ne'ebé foin lalais hetan operasi ne’e,” nia dehan.

Kona-ba dokumentus ne'ebé mak antes ne’e TDD husu ba nia atu legaliza, advogadu Emilia ne’e dehan TDD fó ona prazu. Maibé, to’o agora seidauk bele kumpri. Tanba, regras ho prosedimentu iha Australia seidauk bele legaliza dokumentus ne'e.

“Dokumentus ne’e, nia (Emilia) sei entrega ba konsuladu iha ne’eba (Australia). Hotu tiha mak haruka fila fali mai Timor. Entaun, husu tan tempu oituan ba kontiudu karta ne’e,” hatete advogadu privadu hosi arguida Emilia Pires ne’e. (*)

Aquino Campos - Editór: Alexandre Assis – Ola Timor

Foto:  Advogadu privadu hosi arguida Emilia Pires, José Camões hatete, depois hala'o operasaun iha Australia, arguida Emilia Pires sei kontinua halo tan tratamentu iha Portugal. (Olatimornews Foto/Aquino Campos)