Harii Edifisiu Foun, PN sei Dudu Sees Uma-kain 100

DILI: Uma-kain besik 100 iha area Aitarak-Laran sei sai husi rai ne’ebé sira okupa tanba sei utuliza hodi harii edifisiu foun ba Parlamentu Nasionál (PN).

Dirasaun Nasional Terras Propriadade, Servisu Cadastrais (DNTPSC) entrega ona rai ektare 7 ba PN atu harii sira-nia edifisiu foun, no PN prepara ona orsamentu millaun $5 ba konstrusaun.

Lee mós: PN Sei Harii Edifísiu Foun Besik Palasiu PR

Komunidade sira husu atu governu prepara bairu foun ba sira molok hasai sira husi rai estadu ne’ebé daudauk ne’e sira okupa hela.

“Loos duni rai atu harii edifisiu foun Parlamentu Nasionál nian mak estrada leten ligasaun ho Palasiu Prezidente (Repúblika) nian”,  informa Xefe Aldeia 03 Anin Fuik, Suku Kampung Alor, Francelino Maia ba olatimornews.com iha ninia hela fatin, Segunda (04/12).

Xefe Aldeia ne’e dehan, komunidade sira hakarak atu koopera, maibé governu tenke harii uluk kondisaun ba sira.

Iha fatin hanesan, komunidade ida, Paulina Berta dehan, nia prontu atu husik fatin refere. Maibé, tenke hanoin mós uma no aihoris ne’ebé mak sira kuda ona.

“Ami la kontra, ami mós rekoñese rai estadu. Maibé, hanoin netik ami ninia kolen durante ne’e”, dehan nia.

Entretantu, deputada PN, Izilda M. Soares hatete, orsamentu atu halo konstrusaun ba edifisiu foun ne’e aprova kleur ona.

Ba komunidade sira ne’ebé okupa hela rai ne’e, nia dehan, tenke hetan indenimizasaun.

“Estadu ou governu tenke haree ida ne’e. Dala-barak komunidade husu (indinimizasaun), tuir estandarte, maibé governu mak sei tetu,” dehan nia. (*) 

Tomé Amado - Ola Timor - Editór: Tellukoro

Foto: Parlamentu Nasional sei harii edifisiu foun iha Aitarak-Laran. (olatimornews FOTO: Aquino Campos)