Bispu Dioseze Dili : Eleisaun Jerál Tenki Respeita Ema Nia Liberdade

Dili, (ANTIL) – Eleisaun prezidensiál no parlamentár ne’ebé sei akontese iha tinan ne’e, ema hotu tenki respeita ema ida-idak nia liberdade hodi partisipa festa demokrasia ho páz, verdade no justisa.

Amu Bispu Dioseze Dili, Dom Virgilio do Carmo da Silva, SDB, Informa ba jornalista sira iha Dioseze Dili, Lesidere, Sesta (7/01) wainhira koalia kona-ba liberdade ema nian atu tuir eleisaun jerál.

“Atu selebra festa demokrasia tenki respeita ema nia liberdade, signifika iha paz, wainhira iha verdade, iha paz, wainhira iha justisa iha paz nun’e m’os wainhira iha domin” Amu Bispu esplika.

Tuir Amu Bispu, Eleisaun nia laran ema hotu-hotu tenki konsiente atu hakiak liberdade, lialos no justisa. Domin mak sai hanesan fo naroman ba Timoroan hotu atu bele garante hodi hetan duni páz.

Atu hetan páz no domin, Amu Bispu dehan, ne’e responsabilidade Timoroan hotu, la’os prezidente nian, polítiku sira nian, maibé ema kiik ou boot tenki husu ba ida-idak nia an saida mak tenki kontribui ba páz.

Festa demokrasia hanesan festa liberdade, festa lialos nian no labele sai obstakulu ba ema nia liberdade. Hili ema ne’ebé mak atu bele deside ema hotu nia futuru ne’ebé nabilan no ba nasaun nia di’ak.

Timoroan nia matenek hahu aumenta ba dadaun, atu ukun rai ne’e la presiza ema ne’ebé matenek de’it, maibe presiza prepara ida-idak nia an atu bele partisipa festa demokrasia ho páz no trankilu. (Jornalista : Zezito Silva/Editor : Alberto Alves)