Air Timor Hapara Operasaun Aviaun Citilink Rute Dili-Denpasar

DILI (ANTIL) – Foin lais ne’e, kompañhia Air Timor informa ba públiku katak sei hapara operasaun aviaun Citilink ho rute Dili-Denpasar iha loron 10 Janeiru 2017.

“Air Timor halo parseiru ho Citilink Indonézia, hodi hasa’e nível servisu no seguransa ba rute refere, hodi aviaun foun ne’ebé globalmente hatudu katak operador Citilink la-tama ba Black Listed Uniaun Europa nian”, tuir komunikadu imprensa ne’ebé ANTIL asessu iha mídia social.

Tuir kompañhia Air Timor, esforsu ne’ebé durante ne’e sira halo infelizmente la-sufisiente atu hetan apóiu husi Governu Timor-Leste, “hanesan industria aviaun konsekuensia falta apóiu servisu ne’ebé ami oferese, ho laran susar tebes emediatamente ami halo desizaun hodi taka rute ida refere no operasaun ikus iha loron Segunda, 9 Janeiru 2017”.

Nune’e kompañhia ne’e informa, ba passajeiru sira ne’ebé bilhete viajen entre data 10-15 Janeiru sei automatikamente tranfere ba aviaun Sriwijaya no ba passajeiru ne’ebé bilhete entre data 16 Janeiru to’o 31 Marsu, sei hala’o processu devolve liu-husi Ajensia Travel no eskritóriu Air Timor iha Timor Plaza. (Jornalista: Julia Chatarina/Editor : Alberto Alves)

Foto: Aviao Citilink Indonesia /Citilink Indonézia