segunda-feira, 9 de janeiro de 2017

Família Deside “MarVi Ba Kontinua Eskola Iha Indonézia”

Dili, (ANTIL) – Nu’udar aman hosi Maria Vitória “MarVi”, Antonio Borges, deside ona Marvi atu bele kontinua ninia eskola iha Indonézia hodi bele hasa’e mos ninia karreira iha mundu múzika nian.

“Ha’u reprezenta família hakarak hato’o ba públiku katak fofoun ne’e família sei hanoin no tetu katak MarVi bele ba eskola iha Indonézia ka lae? Maibé iha finál, família rasik deside MarVi tenke ba eskola iha Indonézia no bele promove karreira iha múzika dangdut” Informa Aman hosi MarVi, Antonio Borges ba jornalista sira iha Ótel Novu Turizmu, Lesidere, Domingu (8/01).

Nia haktuir, durante ne’e, Governu mós fo atensaun ona ba Marvi liu hosi Ministériu Edukasaun atu fo bolsa ba nia atu kontinua nia estudu tanba ne’e, nu’udar aman deside ona katak nia tenke kumpre duni desizaun ne’ebé mak inan aman foti.

Nia husu ba entidade hotu atu suporta ideias ba MarVi, nune’e nia bele hala’o nia estudu no nia karreira iha múzika dangdut iha indonézia hodi lori Timor-Leste iha mundu nia matan.

Durante ne’e, públiku preokupa tebes kona-ba MarVi nia estudu, wainhira nia eskola iha Timor-Leste bele hafraku nia kareira, maibé to’o ikus família deside hodi hatan los preokupasaun públiku kona-ba nia estudu iha Indonézia.

Entretantu, Vise Ministra Edukasaun,  Dulce de Jesus hateten, Ministériu Edukasaun iha responsabilidade tomak atu fo apoiu ba artista MarVi ne’ebé durante ne’e hamorin ona Timor Leste nia naran iha reziaun sudeste aziatiku. (Jornalista : Zezito Silva, Editor Alberto Alves)

Sem comentários: