PN Adia Votasaun Final Global LPV

DILI (ANTIL) - Parlamentu Nasionál ohin, Segunda (09/01) tuir ajenda halo votasaun final global ba texto substitutivu ba Lei Pensaun Vitalisia (LPV), maibé tenki adia hikas ba aban lokraik tanba la hetan partisipasaun maksimu hosi deputadu.

Tuir Ajenda No 366/III (5a), reniaun plenaria Segunda-feira ne’ebé mak ANTIL asesu haktuir antes halo votasaun final global ba LPV periodu antes de ordem do dia mak, pedidu justifikasaun falta deputadu Vicenti da Silva Guterres, deklarasaun polítika Parlamentar, intervensaun Deputadu, no Informasaun hosi Sekretáriu Estadu Asunto Parlamentar.

LPV sei halo votasaun iha periodu ordem do dia, maibé tanba iha deputadu nain 58 meja parlamentar diside hodi adia hikas ba aban, Tersa (10/01).

Prezidenti Parlamentu Nasionál (PPN) Aderito Hugo da Costa dehan, lei refere tenki halo votasaun iha final global. Kuandu pendente hela de’it bele perturba lei sira seluk nia diskusaun.

“Aban lokraik mak ita diskuite hodi halo votasaun final global,” PPN Aderito Hugo da Costa afirma iha nia intervensaun, iha Parlamentu Nasionál, Segunda (09/01).

Prezidenti bankada Partidu CNRT fó hanoin katak, aban tenki konsisten hodi halo votasaun maske partisipasaun deputadu sira la máximu.

“Presiza de’it deputadu dois tersu aprova de’it ona,” Natalino dos Santos fó hanoin.

Adia tan loron ida tuir deputadu Joaquim dos Santos nu’udar oportunidade atu bankada sira konsilida an hodi nune’e iha votasaun final global hetan partisipasaun máximu hosi deputadu tomak.

Antes ne’e Parlamento Nasionál (PN) liuhosi plenaria extraordinario aprova ona projeito lei nr 5/III (2a) “Primeira Alteração a Lei nr 1/2007, de janeiro kona-ba rejime pensaun mensal vitalisia ba deputadu ho regalia  no estatutu titular orgaun soberañu hodi despaisa ba komisaun eventual atu halo diskusaun espesialidade.

Rejultadu votasaun ba texto subtituisaun hosi proposta uniku ne’ebé elabora hosi kolaborasaun proposta rua hosi bankada Partidu Demokratico ho bankada FRETILIN ho rejultadu avabor 51, kontra 0, abstain 0.

Nune’e mós ba votasaun jeneralidade projeitu lei nr 5/III ho rejultadu votasaun 51 avabor, kontra 0, abstain 0 husi total deputadu 51 nune’e lei nr 5/III pasa ho unanimidade.

Prezidenti Parlamentu Nasionál hafoin aprova husu atu komisaun eventual konsentra hodi halo diskusaun klean iha generalidade nune’e lori hikas ba plenaria hodi halo aprovasaun final global.

Deputadu membru Komisaun Eventual, Deputadu Antonino Biaco promote katak, sei halo esforsu hodi diskuite didi’ak lei ne’e iha Komisaun Eventual. (Jornalista : Manuel Pinto/Editor : Alberto Alves)