segunda-feira, 9 de janeiro de 2017

Klubu Foun Ezije LFA Kria Liga Terseira Divizaun

PARTILHAR
DILI (ANTIL) - Dirijenti klubu foun balun ejize ba Liga Futeból Amadora (LFA) atu kria mós Liga Terseira Divizaun ba klubu foun sira atu joga tanba sira priénse ona kritéria LFA. Sira sei protesta LFA bainhira la kria Liga Terseira Divizaun.

“Ami hein katak desizaun LFA ne´e oinsá, maibé kuandu ami la tuir, ami klubu foun sira sei halo protestu hasoru LFA tanba ami mós legál.  Ami hetan rekomendasaun hosi Federasaun Futeból Timor-Leste (FFTL) katak ami bele rejistu ba jogu sira iha nasionál no internasionál,” Prezidenti Klubu Lalenok FC, Pedro Belo hato´o asuntu ne´e iha reuniaun entre LFA no dirijenti klubu sira iha Oceanview Beach Hotel, Bebonuk, Dili, Sábadu (7/1).

Nia haktuir, oras ne´e klubu foun hamutuk 11 maka rejistadu iha notariadu no iha klubu lima maka hetan ona sertifikadu jogu inklui ninia klubu. Kompara ho klubu tuan, Belo informa, balun seidauk iha sertifikadu.

Tanba ne´e, atuál Komandante Polísia Munisípiu Dili ne´e husu katak oinsá ho klubu sira ne´ebé maka dokumentus legál kompletu no klubu hirak ne´e merese atu tuir jogu LFA iha Terseira Divizaun ou lae.

Entretantu, Sekretáriu Ezekutivu LFA, Sergio Hornai hateten iha posibilidade kria liga Terseira Divizaun maibé sei haree sirkunstánsia sira ne´e hotu katak bele ka lae, tamba ne’e LFA sei túr hamutuk ho Sekretaria Estadu Juventude no Desportu (SEJD) hodi bele buka solusaun pasífika ba kestaun ida ne´e. (Jornalista: Xisto Freitas/Editor : ALberto Alves)

Foto: Reuniaun entre LFA no klubu sira. Foto ANTIL/Xisto Freitas
PARTILHAR

Author: verified_user

Publicação luso-timorense sem fins lucrativos

0 comentários: