BEM-VINDO PRESIDENTE DA REPUBLIKA 2017-2022, DR. LU-OLO

Filipe Rodrigues Pereira*, Dili - opiniaun

Periode Politika 2017 – 2022 hahu’u a’an ho kandidaturas Presidente da Republika (PR). Hahu’u ho Dr. Jose Samalarua Neves, Dr. Antonio Fatuk Mutin Maher Lopes, Dr. Antonio Conceicao, Sra. Angela Freitas, Dr. Jose Lugo Guterres, Sr. Luis Tilman, Sr. Amorin no Sr. Dr. Francisco Guterres Lu-Olo.

Nudar sidadaun kandidatu hot-hotu liu ona kondisaun sira nebe’e apropriadu tuir lei haruka. Nudar humanu, kandidatu sira hotu klaru iha sira nia plus no minus. Hanesan “maduru” iha politika, postura no saude. Iha Timor-Leste daudaun, aspetu “maduru” iha politika mak sei sai liu konsiderasaun ba’a elitores hodi hili sira nia Presidente da Republika (PR).

Alem de aspetu “maduru” iha politika, presiza hare mos ba’a makina politika no figura potensial sira nebe’e mak fo’o suporta ba’a kandidatu sira. Formalmente makina politika bo’ot iha Timor-Leste mak P-CNRT, partidu Fretilin, PD, F-Mudansa no partidu sira seluk tan. Iha mos figura Politika nasional nebe’e potensial liga ho suportasaun iha Eleisaun Presidensial periodu 2017-2022 ida ne’e. Iha Maun Bo’ot Xanana Gusmão, Dr. Ramos-Horta no Taur Matan Ruak. Parte seluk iha mos forsa moral, igreja katolika.

Hakait makina politika no figura potensial nebe’e fo’o suporta  ba’a kondidatu sira maka matematikamente Dr. Francisco Guterres Lu-Olo sai kandidatu potensial atu hakat ba’a Aitarak Laran fulan hirak mai. Taru’an mak ne’e, Dr. Francisco Lu-Olo manan kedan iha primeira volta ka sei tama to’o segunda volta?!

Hakerek’nain fiar katak, wainhira makina politika bo’ot rua, Partidu Fretilin no P-CNRT i partidu ki’ik seluk hanesan KHUNTO halai hamutuk iha kampanhe Presidensial maka tsunami politika hodi hamanan Dr. Francisco Guterres Lu-Olo ba’a PR iha primeira ronde la’os defisil, ezeptu natureza mak la fo’o dalan. Liga ho forsa moral maka durante ne’e ita bele dehan Dr. Francisco Lu-Olo la iha mos ‘problema’ ho parte igreja katolika.

Maibe publiku sei hein, oinsa “desizaun no aksaun formal P-CNRT ba’a eleisaun presidensial hodi hamanan Dr. Francisco Guterres Lu-Olo. Hakerek’nain fiar katak P-CNRT sei la husik Maun Bo’ot, Kay Rala Xanana Gusmão la’o mesak, P-CNRT sei tane desizaun pesoal Xanana nian sai nudar desizaun partidu nian, desizaun estrutura no militantes tomak P-CNRT nian, tamba wainhira Dr. Francisco Lu-Olo manan iha primeira volta sei foti a’as liu tan Maun Bo’ot nia oin iha vida politika Timor-Leste. Hamutuk ho partidu Fretilin, P-CNRT tenki halo esforsu makas, funsionaliza makina partidu nian to’o baze hodi hamanan Dr. Francisco Lu-Olo iha primeira volta.

Oinsa ho kandidatu Presidente da Repbulika sira seluk ba’a tinan politika 2017-2022? Prosesu politika depois de Timor-Leste hetan hikas ninia independensia iha tinan 2012, hahorik no hamosu mos figura foun lubun nebe’e mai husi jerasaun foun, juventude da resistensia sira. Maibe, tuir Hakerek-nain, politikamente seidauk tempu iha tinan 2017 ne’e ba’a figura foun sira refere atu hetan suportasaun politika nebe’e bo’ot husi eleitores hodi sai Presidente da Republika iha periodu politika 2017-2022. Makina politika nebe’e suporta jerasaun foun ladauk sufisiente, nune’e mos pesoalmente kandidatu foun sira nia figura ladauk konhesidu diak iha sosiadade nia let em jeral. Jerasaun foun sira dalaruma bele utiliza periodu politika ne’e nudar pemanasan/jinastika politika hodi sosializa-a’an no sosializa sira nia pensamentu diak hodi konkore hikas iha Periodu Politika 2022-2027.

Iha periodu politika 2022-2027, iha posibilidade ba’a  Dr. Lu-Olo rekandidata a’an. Dr. Lu-Olo bele reeleitu wainhira iha periodu politika 2017-2022 hala’o k’nar ho diak, hala’o k’nar diak signifika hatu’ur a’an nudar aman ba’a nasaun no povu tomak, hala’o k’nar nudar aman nasaun nian iha area internu no externu ho proporsionalmente.

Maibe dalaruma mos tempu jerasaun foun atu tu’ur iha kadeira PR monu iha periodu politika 2022-2027. Ne’e bele akontese se kazu kontrariu, Dr. Francisco Lu-Olo la hatudu ninia obrigasaun nudar PR hodi hala’o k’nar diak nudar aman ba’a nasaun. Bele mos tamba tinan lima nebe’e sei mai, jerasaun foun sira prepara a’an diak liu tan ona, pesoal no institusionalmente hodi kompete ho kandidatu seluk no incumbent. Ou tamba mos konjuntura politika foun nebe’e mosu iha tinan lima mai bele fo’o dalan ba’a jerasaun foun sira  asumi k’nar nudar Presidente da Republika iha futuru.

Koalia konaba konjuntura politika foun maka ema sempre hakait lian murak politika nebe’e dehan katak “la iha amigu ka inimigu mak eterna, intereses deit mak eterna”. Karik P-CNRT no partidu Fretilin sei iha intereses nebe’e hanesan iha tinan 2022-2027 liga ho eleisaun Presidensial?! Ou iha tempu besik, P-CNRT no partidu Fretilin sei iha hanoin ka intereses nebe’e hanesan konaba politika governasaun nian iha periodu politika tuir mai, 2017-2022?!

Liga ho governasaun foun iha tinan 2017 maka governasaun ne’e sei depende tebes ba’a rezultadu eleisaun geral hodi hili membru parlamentu sira. Iha eleisaun geral klaru partidu hot-hotu ka koaligasaun partidu sira sei haka’as a’an ho ida-idak ninia k’bit rasik atu nune’e bele atinji ka sai manan-na’in hodi ikus bele loke posibilidade luan ba’a ka’er governasaun iha periodu tuir mai.

Governasaun tuir mai, bele P-CNRT mak kontinua lidera, partidu Fretilin mak lidera, P-CNRT hamutuk ho partidu Fretilin mak forma governasaun, P-CNRT no Partidu Demokratiku mak forma governasaun, partidu Fretilin no Partidu Demokratiku mak forma governasaun, partidu Fretilin no PLP mak forma governasaun, P-CNRT no PLP mak forma governasaun, ka bele mos partidu bo’ot sira hamutuk partidu ki’ik sira seluk mak forma governasaun. Depende ba’a intereses.

Koalia mos konaba formasaun du governu, Presidente da Republika ninia papel importante nudar aman ba’a nasaun no aman ba’a povu tomak iha ninia influensia bo’ot atu negosia ho partidu vensedor ka partidu koligasaun sira hodi forma governasaun. Presidente sei uza ninia k’nar konstitusional hodi harí governu nebe’e diak, solidu no forte hodi kontinua dezenvolve nasaun ne’e iha periodu politika 2017-2022.

Hakerek-nain fiar katak nasaun ninia sobrevivensia iha prosesu konstrusaun de estadu mak sei sai konsiderasaun a’as ba’a Presidente da Repbulika hodi forma VII Governu Konstitusional. Intereses nasional no bem estar ba’a povu mak sei sai padraun fundamental ba’a Presidente da Republika bolu no koko halo negosiasaun ho partidu politika sira hodi forma governasaun. Hare ba’a sistema politika iha Timor-Leste ladauk la’o ho diak maka atu atinji intereses nasional presiza iha “sustentabilidade ba’a estabilidade governativa” atu nune’e governu la “monu ka rahun” iha dalan klaran.

Estabilidade governativa mak sei garante no lori dezenvolvimentu sosial, politika no ekonomika ba’a nasaun no povu nia moris. Estabilidade governativa presiza tetu mos ho proporsionalidade politika ida, iha governu nebe’e solidu no opozisaun nebe’e kualifikadu iha Parlamentu Nasional.

Hakait Eleisaun Presidensial tinan 2017, hanesan temi ona iha leten, minimal publiku bele hetan ona leitura ida konaba se-se mak suporta se, espesialmente Partidu nebe’e deit mak suporta kandidatura se-se. Mosu kestaun, oinsa Partidu nebe’e la iha kandidatu PR maibe suporta kandidatu PR nebe’e mai husi partidu seluk, karik iha impaktu positivu ou negativu ba’a partidu refere hodi hetan votus iha Eleisaun Geral nebe’e sei hala’o fulan hirak tuir mai?!**

*Hakerek’nain nudar Membru Comite 12 de Novembru, Opiniaun pesoal, la reprezenta instituisaun nebe’e Hakerek’nain hakna’ar a’an ba’a.