ONG konsidera karta aberta hosi Xanana Gusmão hanesan interferénsia polítika iha justisa

Karta aberta ne'ebé maka Xanana Gusmão defende eis-ministra na'in rua, ne'ebé kondenada hosi Tribunal Díli nian, hodi kritika sistema judisial Timor-Leste nian, reprezenta dalan ida ba interferénsia polítika iha sistema judisia, defende hosi organizasaun timoroan ne'ebé la'ós governu nian.

Avaliasaun ne'e halo hosi Justice System Monitoring Program (JSMP), organizasaun ne'ebé monitoriza justisa iha Timor-Leste no analiza ona karta polémiku ne'ebé asina iha loron 25 Janeiru hosi atual ministru Planeamentu no Investimentu Estratéjiku.

"JSMP kondena maka'as postura polítika ne'ebé kontinua interfere iha sistema. Prátika ne'e ameasa maka'as ita nia independénsia judisial no viola prinsípiu hodi haketak kbiit sira ne'ebé hatete iha Konstituisaun Timor-Leste nian", konsidera hosi Luis de Oliveira Sampaio, diretor ezekutivu JSMP nian iha komunikadu ne'ebé haruka ba Lusa.

"La'ós hanesan ba dala uluk maka majistradu judisial sira hetan presaun no haree katak ema la fiar iha sira nia serbisu. Iha nafatin kazu barak ne'ebé hatudu tendénsia ne'e, akontese bainhira desizaun sira la'ós favorável ba interese polítiku sira nian, no tendénsia ne'e ameasa ita nia demokrasia", hatete hosi JSMP.

Organizasaun konsidera katak instituisaun judisial sira tenki sai hanesan independente no "livre hosi dalan ida ba interferénsia polítika nian relasionadu ho desizaun judisial sira" ne'ebé bele protesta de'it liuhosi mekanizmu jurídiku sira ne'ebé adekuadu.

Iha karta, ne'ebé maka Lusa hetan asesu, Xanana Gusmão halo krítika maka'as ba sistema judisial timoroan nian no halo akuzasaun sira kona-ba deskonfia kazu sira hosi abuzu ba fundu públiku sira hosi responsável prinsipal na'in rua iha área justisa Timor-Leste nian, prezidente Tribunal Rekursu ho Prokurador-Jeral.

"Interferénsia ne'e prejudika maka'as serbisu hosi área judisial no prejudika instituisaun públiku sira ne'ebé Estadu estabelese ona no ne'ebé investe ona iha períudu naruk nia laran. Prejudika mós konfiansa hosi públiku kona-ba funsionamentu di'ak no ba kredibilidade hosi Instituisaun judisial sira no viola prinsípiu sira igualdade no universalidade ne'ebé previstu", konsidera hosi JSMP.

Organizasaun felisita Xanana Gusmão katak kumpri ona nia dever síviku hodi aprezenta hanesan sasin iha julgamentu hosi eis-ministra sira nian, ne'ebé kondenada tanba partisipasaun ekonómiku iha negósiu iha kastigu ida ne'ebé hetan ona rekursu hosi defeza no Ministériu Públiku.

JSMP konsidera katak sidadaun tomak "iha direitu hodi kestiona desizaun judisial sira ne'ebé sira konsidera la justu no viola sira nia direitu fundamental sira" no insisti tribunal sira "hodi respeita no defende direitu hosi sidadaun tomak ba julgamentu justu ida" no "garanti katak desizaun judisial tomak sai hanesan kredivel no bazeia de'it iha faktu no prova sira" ne'ebé aprezenta durante julgamentu.

"Protestu ruma kona-ba defisiénsia sira hosi desizaun judisial ida tenki halo liuhosi mekanizmu jurídiku sira ne'ebé adekuadu, la'ós liuhosi karta aberta ida ne'ebé hanesan intervensaun direitu ida iha serbisu judisiáriu nian", nia hatutan.

Iha JSMP nia komunikadu fó hanoin mós katak Emília Pires hakerek tiha ona karta aberta ida ba Prezidente Repúblika hodi aponta iregularidade oioin hosi nia prosesu no defende kriasaun hosi komisaun internasional ida hosi ema sira eminente sira hodi analiza sistema tomak justisa nian.

Nia insisti katak "órgaun ne'ebé iha kompeténsia hodi superviziona jestaun no disiplina" hosi majistradu sira maka Konsellu Superior Majistratura nian, rekomenda nune'e ba xefe Estadu hodi "hadook aan hosi desizaun ruma ne'ebé foti kona-ba kriasaun hosi komisaun internasional ida" ba funsaun ne'e.

SAPO TL ho Lusa