PR TAUR KONTRA HANORIN LIAN MATERNA, BOOT NIA OAN APRENDE INGLES HO PORTUGUES

Prezidente Republika (PR) Taur Matan Ruak, deklara katak, nia kontra profesor atu hanorin estudantes ho lian materna iha eskola, tanba ema ki’ik nia oan hanorin ho lian materna, maibe bo’ot nia oan hanorin Ingles ho Portugues.

“Hau kontra hanorin labarik sira ho lian materna, tanba labarik sira ne’e importante tenke hatene lian Portugues tanba Portuges maka hanesan lian ofisial la’os ba inventa fali hodi hanorin labarik sira ho lian materna,” alerta PR Taur Matan Ruak, liu husi dialogu komunitariu iha Suku Mali –Ubu, ne’ebe konsentra iha Salaun Igreja Nossa Senhora das Dores Hauba, Postu Administrativu Bobonaro, Munisipiu Bobonaro, Tersa (07/02/2017).

Taur konsidera katak, lian Ingles ho Portugues maka nudar katana kroat ba sidadaun sira nia futuru no bele dezenvolve nasaun, la’os lian materna.

“Hau nia oan sira la obrigatoriu atu hatene lian Makasae. Hau haruka ba eskola iha Portugues tanba ne’e ha’u hakarak profesor sira ne’e hanorin estudante sira ne’e ho lian Portugues, maibe programa ida ne’e uluk maun Xanan nia kaben maka halo maibe halo tiha maun Xanana nia oan ba eskola fali iha Australia,” hateten PR Taur.

Taur hateten, labarik estudante sira ne’e maka futuru nasaun ne’e nian, tanba ne’e profesores sira tenke honorin lian ofisial no lian internasional, la’os lian materna.

PR Taur husu ba Ministeiru Edukasaun atu identifika profeosres sira para hanorin liangua sira ne’e, tanba hotu-hotu hatene profesores nudar prezidenti mundu no iha Timor tanba profesores hanorin ema atu sai ema.

Taur esplika, iha Indonesia nian uluk bandu ko’alia Portugues tanba sira hakarak ne’e atu sai hanesan ho sira, tanba ne’e maka sira obriga koalia lian Indonesia.

Antes ne’e, Salamão dos Santos husi Suku Maliubu hato’o preokupasaun ba Prezidente Republika Taur Matan Ruak konaba hanorin eskola ho lian materna. Nia hateten, tuir lolos hanorin lian Ingles ho Portugues.

“Ami povu ki’ik sira ne’e preokupa kona ba eskola tanba estadu loke eskola iha Timor ne’e profesores hanorin labarik sira ho lian materna, maibe ema bo’ot nia oan sira ba eskola iha liur hodi hatene lian Portugues ho Ingles,” dehan Salomão.eus

Jornal Nacional Diário

LEE MÓS JORNAL NACIONAL DIÁRIO