terça-feira, 6 de junho de 2017

Governu Aprova Dekretu Lei Regula Profesór


DILI, (TATOLI) – Governu liuhusi reuniaun Konsellu Ministru ohin, aprova dekretu lei ida hodi regula servisu profesór sira atu zero violénsia no abuzu seksuál hasoru estudante sira  durante prosesu aprendizajen la’o.

Dekretu ne’e aprezenta husi ministériu edukasaun tanba konsidera importante atu regula servisu profesór sira.

“Dekretu lei ne’e hodi regula atetude profesór sira, haree liu disiplina mai eskola hanorin oinsá, mai tarde ne’e oinsá, se-karik iha violasaun seksuál, hanorin labarik sei la uza violénsia”, dehan Xefe Gabinete ministériu edukasaun, Hermenegildo Magno Gomes iha Palásiu Governu.

Dekretu ne’e fó dalan atu prosesa profesór iha tribunál bainhira halo abuzu seksuál hasoru estudante no prosesa tuir lei funsaun públika.


“Sansaun ne’e iha prosedimentu, bainhira kazu ruma hanesan violasaun seksuál ne’e nia relatóriu sei hato’o ba ministériu públiku, kazu sira ne’e sei hato’o ba Komisaun Funsaun Públika hodi haree kona ba funsaun públika ninian no kazu kiik sira sei regula tuir dekretu”, tenik.

Nia esplika durante ne’e mosu kazu violasaun hasoru estudante maibé prosesu ba atendementu tarde tanba seidauk iha bazé legál. “Ezemplu violasaun seksuál, komunidade ne’ebé hetan  bele hato’o direta ba polísia no submete ba lei, tanba durante ne’e dekretu lei seidauk, entaun mosu kazu ruma prosesu ne’e tarde loos tanba sei liuhusi inspetór jerál depois hato’o relatóriu mai ministériu hafoin iha rezultadu ruma”, esklarese.

Iha fatin hanesan, Komisaria Nasionál Direitu Labarik, Maria Barreto hateten ho aprovasaun dekretu ne’e sei proteje labarik sira husi violasaun seksuál no violasaun fíziku durante prosesu aprendizajen.

“Ami orgullu no hato’o parabéns ba governu liu-liu ba ministériu edukasaun ne’ebé mak iha hanoin di’ak ba labarik sira”, katak.

Jornalista: Agapito dos Santos | Editora: Rita Almeida

Foto: Enkontru Konsellu Ministru, ohin. Foto GPM

1 comentário:

DIREITU ADMINISTRATIVU KONSTITUSIONAL TIMOR-LESTE disse...

Hau hanoin la persisa hamosu tan lei bar-barak, tamba ita nia kodigo penal regula ona ba kazu krime seksual ba minioria idade, nia prosesu mos regula ona iha kodigo prosesu penal. Governo gosta hamosu lei bar-barak mais nia implementasaun zero. ita sou gasta osan ba lei nebe iha tiha ona, sei dauk implementa ho maximo, ita hamosu tan lei ida ba kazu nebe hanesan. nee hau hanoin ita sou atu gasta estraga osan estadu deit. obrigado.