sábado, 1 de julho de 2017

STAE Fasilita Votasaun Iha HNGV

PARTILHAR
Sekretariadu Tekniku Adminitrasaun Eleiotral (STAE) fasilita votasaun ambulatoriu ba pasientes no familia iha Ospital Nasional Guido Valadares (HNGV).

Xefe Gabinete Kontrolu Kualidade, Komunikasaun Sosial e Juridiku HNGV,  Paulina Pinto hateten STAE fasilita votasaun ambulatoriu ba pasiente sira, tanba sira mos iha direitu atu vota.

Enkuantu total pasientes ne’ebe tuir registu no vota hamutuk nain 280 inklui membru familia (nain ida) hamutuk 560. 

Alende pasientes, nia hateten  iha mos professional saude hamutuk nain 166 ne’ebe mai husi munisipio seluk ne’ebe hala’o knar iha HNGV no tuir votasaun.

Votasaun iha HNGV hahu tuku 7:00 dader, no ekipa STAE hamutuk ho fiskais sira lori kabinet (ida) no urnas rua la’o tama-sai salas hodi fasilita pasiente sira vota. 

Maske nune’e , familia pasiente husi munisipiu Baucau, Francisco Manuel Gusmão lamentavel ho lei ne’ebe iha, tanba permite deit ba pasiente no familia ida mak bele vota.


Hanesan sidadaun, nia sente triste tanba labele partisipa iha elisaun prezidensial iha tinan 2017 ne’e.

“Familia sira sempre troka malu hodi hein pasiente, maibe lei fo dalan deit ba ema ida deit mak bele vota, entaun lei mak hamate ami nia direitu, la’os ami mak lakohi vota,” nia lamenta iha HNGV Bidau, Dili. 

Alende ne’e, nia mos husu ba ukun nain sira liu –liu Parlamentu Nasional atu halo lei ruma tenke haree ba realidade no kondisaun iha rai laran nian, liu –liu transporte.

 “Tenke tetu ho kondisaun real ne’ebe iha, labele halo lei arbiru deit,” nia sujere. 

Preokupasaun hanesan hato’o mos husi  familia pasiente husi munisipiu Covalima, Ana Soares katak nia mai iha Dili tanba situasaun moras. 

“Ami husu ita bo’ot sira atu kontaktu malu hodi buka solusaun ba ami, tanba ami mai husi munisipio no ami hakarak vota,” nia hateten.

Hatan ba kestaun ne’e, Asesor Juridiku Sekretariadu Tekniku Administrasaun Eleitoral (STAE), Filomena Henrique katak STAE implementa tuir lei ne’ebe iha, katak pasiente no membru familia nain ida deit mak bele  halo votasaun ambulantorio.

“STAE hanesan orgaun implementador elisaun tuir regras no lei ne’ebe ukun nain sira aprova ona, ami labele hakat liu fali leis ne’ebe iha,” nia hateten.

Tanba ne’e, nia husu ba sira atu hato’o reklamasaun ba iha Komisaun Nasional Elisaun (CNE), tanba sira mak tau matan ba prosesu tomak. 

Enkuantu elisaun jeral prezidensial hala’o simultania iha teritoriu tomak iha Timor-Leste.

Paulina Quintão | The Dili Weekly
PARTILHAR

Author: verified_user

Publicação luso-timorense sem fins lucrativos

0 comentários: