Heineken Oferese Bee-Mos ba Komunidade BTN-3

DILI - Kompania Heineken oferese bee-mos ba komunidade Bairru BTN-3, Aldeia Terra Santa, Suku Madohi, Postu Administrativu Don Aleixo, Munisipiu Dili.

Hahu husi tinan 2006 komunidade husi Bairru BTN-3 halerik bee-mos, maibe laiha ukun nain ida mak se tilun hodi rona preokupasaun povu kiik sira nee. Laos deit, iha fatin nee mak hamrok ba bee-mos maibe, iha fatin seluk mos susar atu asesu bee-mos.

Bee-mos hanesan nesesidade baziku neebe importante ba ema nia moris, tanba nee komunidade ho inisiativa rasik halo proposta ba kompania Heineken hodi ajuda fura fodik bee-mos ba komunidade iha barriu refere. Tanba laiha dalan seluk, se uainhira governu rasik latau matan ba povu kiik sira nia problema iha sira nia moris.

Duarte Xavier da Fonseca, nuudar trabalador Kompania Heineken, neebe kompania konsidera nia hanesan heroi ba nia komunidade. Tanba nia nuudar trabalador dahuluk neebe hatoo nia proposta ba kompania refere hodi ajuda bee-mos ba komuidade iha fatin refere, neebe ho uma-kain hamutuk 759, kuaze ema nain 4.717 mak bele asesu ona ba bee-mos.

Tuir Duarte katak, nia foti inisiativa ida nee, tanba nia mos hela iha fatin nee, neebe infrenta bee-mos hahu husi tinan 2006 too agora. Tanba nee hanesan trabalador iha kompania Heineken halo proposta, ikus mai realiza duni.

“Hau foti inisiativa halo proposta ba kompania Heiniken atu ofrese bee-mos, tanba hau hanesan komunidade neebe hela iha bairru nee durante nee sempre halerik bee-mos maibee laiha nai ulun ida respode netik halerin nee. Hau agradese ba kompania Heineken neebe oferese bee-mos gratuita ba komunidade BTN-3,” katak nia ba jornalista depois serimonia inagurasaun bee-mos iha Bairru BTN-3 Tasitolu, Kinta (24/8/2017).

Iha fatin hanesan Prezidente Autoridade Munisipal Dili, Gaspar Soares dehan, bee  importante tebes, tanba nee komunidade iha fatin refere tenke agradese katak ohin bele hetan ajuda  ho valor orsamentu neebe makas, maibe nee kompania Heineken oferese deit ba komunidade iha BTN- 3.

“Komunidade sira tenke haksolok, tanba hetan buat neebe importante tebes. Bee-mos laos sai preokupasaun deit husi komunidade fatin nee, maibe fatin seluk mos sei halerik ba bee-mos. Hanesan husi Taibesi, Bairru-Pite, liuliu husi Cacaulidun sira mos preokupa ho bee-mos tanba bee laiha. Tanba nee ita buka hela oinsa para bele husu ba kompania Heineken atu bele ajuda,” tenik Gaspar.

Tuir Gaspar katak, Kompania Heiniken mai halo investimentu iha Timor mai ho sira nia osan rasik, mai ajuda loke servisu ba ema Timor-oan. Sira mai halo investimentu no halo mos kontribuisaun sosial ba komunidade sira. Hanesan ajuda fura fodik bee-mos, hodi tulun komunidade sira. Ho prezensa bee-mos neebe mak Heineken oferese ona, bele tulun maluk sira husi sosa bee, no ba buka bee iha fatin dook.

Tanba nee uza bee tenke ho diak iha tempu diak, tenke tau matan ba makina neebe uza dadauk nee. Bainhira makina nee aat, konsekunesia ba komunidade sira iha fatin nee.

Iha biban nee Gaspar husu ba komunidade iha fatin seluk, atu haree tuir ezemplu nee, kata tenke iha iniasitiva rasik hodi halo proposta ba Kompania Heineken hodi fo tulun bee-mos ba komunidade sira.

Nunee mos, Gestor Masimu Heineken Timor, Vinay Mathur afirma, traballador sira hotu atu aprezenta proposta ida neebe benefisia komunidade sira iha sira nia hela fatin.

“Heineken iha Timor-Leste (TL) komete-aan ba parseira ema TL iha sira nia dezemvolvimentu. Ami ajuda hela komunidade husi ami nia traballador sira hadia sira nia loron no sira nia moris, nuudar parte ida husi ami nia inisiativa sustantibilidade,” katak Vinay Mathur.

Tuir Vinay katak, Duarte Xavier da Fonseca, nuudar trabalador dahuluk neebe hatoo nia proposta. Nia agora heroi ba ninia komunidade iha Tasitolu.

Nunee mos reprejentante Suku Madohi Floriano de Jesus sublina, liu husi opurtunidade nee hakarak agradese ba Duarte neebe halo ona proposta ba kompania Heineken hodi oferese bee-mos ba komunidade iha Bairru BTN-3.

Nia husu ba komunidade sira atu uza bee ho diak ba tempu naruk, tanba bee mak nesesidade baziku neebe importante ba ema nia moris.  

Domingas Gomes | Suara Timor Lorosae