Prado, Pensaun Vitalisia no regalias seluk ba deputadu sira iha PN

Informasaun públiku ne’ebé rona loron-loron husi Deputadu/a no Povu bain-bain

Celestino Gusmão* | Díli | opiniaun

Istorikamente, iha 2007-2008, Polítika benefisia an mosu iha Parlamentu Nasional, maske iha momentu ne’ebá, ita nia rai enfrenta krize militár no Polítika, Polítiku sira apreveita povu nia ta’uk no terus sira aprova lei pensaun vitalisia no hola karreta Pajero ba membru Deputadu sira. Iha momentu ne’ebá Polítika sira hanoin, ita iha rezerva mina no gas barak, kuandu hotu sei bele fera foho sira iha Timor hodi fa’an osan mean no mutin hodi selu ba deputadu/a no eis titulares estadu nia sira seluk. Front Mahasiswa Timor-Leste foti prosesu kontra Polítika ida ne’e, ikus mai estudante besik atus ida mak hetan tiru no hatama ba sela hodi akuza ba tribunál ho lia falsu oin-oin. Fini ba kontra Polítika kontén ne’e hahú iha momentu ne’ebá, ohin tama ona iha agenda sosiedade tomak nia, ate eis Prezidente Repúblika maun boot TMR mós lori ba Kampaña luta kontra pensaun vitalisia, ema barak agora kontinua luta.

Deputadu no deputada sira hatete, ami reprezentante lejítimu povu Timor nian, ami eleje liu husi mekanizmu eleitorál ida lejítimu no tuir lei. Ami halo servisu barak ba ita nia rai, ami halo lei atu asegura direitu no interese ita nia povu nia, ami halo fiskalizasaun hodi asegura katak Governu no impresario sira la halo kolaborasaun hodi dezvia rekursu públiku ba sira nia interese no ami halo ona desizaun Polítika barak hodi mantén nasaun ne’e nia estabilidade no seguransa permanente.

Ami sakrifiika ami nia matenek hodi servisu de’it ba povu iha PN, ami nia maluk barak utiliza sira nia matenek ba buka moris di’ak ho harii aliserse di’ak ba sira nia família nia futuru, ami nia maluk sira utiliza sira nia moris livre ho deskansa no goza moris iha hakmatek nia laran. Ami ema ne’ebé merese hanaran suisídiu klase, ami merese konsidera ema ne’ebé estadista hodi kontinua hakarak tau matan ba ita nia rai. Ami merese ba pensaun vitalisia, karreta loloos la’ós Prado maibé tenke Hummer. Só ida ne’e mak bele dinignifika titular ida estadu ida ne’e sira nia dignidade iha nasaun ida ne’e nudár símbolu ba prospriedade povu Maubere nian.

Se povu la fornese regalias sira ne’ebé mensiona iha leten, sei hamenus motivazaun matenek sira nia atu partisipa iha vida polítika iha futuru, nomos ema barak lakohi halo polítika atu ba sai deputadu tanba sira nia sakrifisiu laiha garantia ba sira nia moris di’ak. Karreta Prado ne’e PN halo ona espesaun no analiza katak kustu ba manutensaun montante liu fali hola karreta foun. Tanba ne’e deside ba leilaun ba kargu polítika ne’ebé só fó de’it ba iha deputadu sira tanba sira mak kaer kargu polítiku hodi lakohi loke asesu ba públiku atu partisipa. Polítiku sira mós hatete, osan husi pensaun vitalisia no karreta Prado, ki’ik liu kompara ho orsamentu ba edukasaun saúde no projetu boot sira ne’ebé sei ajuda povu kiak sira.

Sosiedade sivíl, estudante no povu nia hanoin, Ukun na’in sira reprezenta povu, la’ós ba troka fali ida ne’ebé nia reprezenta. Sira halo servisu simu ona osan ho goza regalias barak tebes hahú husi simu saláriu US$2.500.00 (rihun rua atus lima) to US$4.750.00 kada fulan. Sira halo lei rasik ba hetan karreta Pajero-Prado karik iha futuru Hamer, Kombustivel kada semana US$50.00, manutensaun karreta kada fulan ho favor osan US$600.00 sira hetan mós pirdien US$85.00 kada loron kuandu sira halo servisu fiskalizasaun komisaun no hasoru eleitoradu sira, sira mós hetan pulsa US$100.00 kada fulan hodi fasilita ba sira nia servisu, sira mós hetan fasilidade hanesan laptop folin karun no kadeira luxu iha Parlamentu Nasional.

Ikus mai sira rekere pensaun vitalisia tan, sira reprezenta povu ka substitui povu hodi hetan dalan ba atinje priviléjiu sira ne’ebé temi iha leten? Ita bele sukat sira nia produtividade, ita bele sukat sira nia Polítika di’ak ba ita nia rai. Lei hirak mak sira hasai kosar mak prodús? Teste hira mak sira halo hodi asegura katak OGE kada tinan afavor duni ba povu vulneravel sira? Intensionalmente sira halo ida ne’e tanba sira hanoin Povu ki’ik sira laiha abilidade atu kestiona sira nia polítika at. Intensionalmete halo Polítika at atu halibur riku no fó kondisaun ba sira nia a no família. Ba Povu pratika ida ne’e nudár korrupsaun Polítika tanba legaliza aktu kontén iha lei no regulamentu sira, hodi hipnotiza povu, ida ne’e nudár pratika obscurantism foun ba ita nia povu.

Leilaun signifika tenke tuir prosesu konkursu ida, tenke liu husi prosesu inspesaun independente ida hodi fó sai relatóriu kredivel ida hodi asegura katak la iha prejuizu ba estadu kona-ba karreta ne’e di’ak ka ladi’ak no evita konflitu ba interese iha prosesu laran. Povu nia Wakil sira lohi ona nia ketua, lohi ona sira nia boos ne’ebé haruka sira reprezenta sira iha PN hodi asegura servisu Governu nian iha atendimentu públiku. Se tan mak ita garantia atu asegura polítika di’ak ba ketua sira? Deputadu sira hatene katak iha 2015 posu mina naran Kitan maran ona, menus tinan 5 tan Bayu Undan sei maran, ita nia osan iha fundu petrolíferu sei hela de’it istória kuandu ita nia rai kontinua ho aktu kontén hanesan ne’e.

MUTL halo manifestasaun liu dala rua kontra Polítika pensaun vitalisia, sira hasoru lider barak inklui hasoru Prezidente Partidu Fretilin, atuál Prezidente Repúblika Sr. Dr. Francisco Guteres “Luolo”, iha momentu ne’ebá, Luolo hatete, bele halo lei ida para revola tiha pensaun vitalisia, atu halo Revogasaun inisiativa tenke mai husi deputadu sira. Finalmente, halo duni revizaun ba lei ne’e maibé povu konsidera revizasaun ne’e nudár pratika karik rai rahun de’it.

Maun Taur dehan, sira halo at barak tiha ona, ita mós nonook barak tiha ona, agora tempu ba ita atu ko’alia no hatudu sira nia bosok. Sira moe mak laiha duni, hatete maun TAUR iha Kampaña eleitorál iha Tasi tolu.

Abracos. Abaixo Pensaun Vitalisia e Abaixo Karreta luxu.

*Celestino Gusmão - Hakerek na’in nudár ativista ba direitus umanus no membru ba aliansa nasionál Timor-Leste ba tribunal internasionál (A-N-T-I) no staff iha La’o Hamutuk.