CARAVELA,
(TATOLI) - Tempu bai-loron rezulta menus bee, menus ai-han ba animál sira
nune’e animál sira isin la iha no sira ne’ebé la aguenta hamlaha mate.
“Iha
uma ne’e, karau ida mak mate ona, inklui nia oan ida tanba menus bee no ai
han,” informa karau na’in André de Sá, iha Caravela-Vemase, ohin.
Karau
seluk ne’ebé sei moris isin la iha no arraska hetan du’ut no ai tahan matak
sira. “Bai loron ne’e bee menus, du’ut no ai tahan sira arraska halo karau sira
isin la iha. Sira ne’ebé moris ne’e tan aguenta,” nia informa tan.
Entretantu,
bee menus, du’ut maran no ai tahan sira arraska ba animál sira tanba aktu umanu
nian ne’ebé la iha responsabilidade hodi so’e fo’er no sunu rai arbiru.
Nune’e
mós menus konxiénsia hodi la kumpre orden ne’ebé mak governu liuhusi ministériu
kompetente fó sai. Tan ne’e, atu evita menus ai han ba animál sira, menus bee,
di’ak liu ita keta sunu du’ut, taa ai no sa’e fo’er arbiru hodi kontribui ba
bio diversidade.
Governu
liuhusi Ministériu Komérsiu, Indústria no Ambiente (MKIA) liuhusi Diresaun
Nasionál Protesaun Bio diversidade, antes ne’e avizu fó atensaun ba sidadaun
hotu, tuir dekretu lei nú. 26/2012 lei baze ambientál artigu 7 (Sidadaun nia
dever), kódigu penál 215 (Contra o ambiente), kódigu 217 (Contra flora e fauna)
husu ba públiku atu labele soe sigarru rohan ne’ebé lakan hela husi karreta,
motor ka transporte públiku.
Tuir
mai, labele halo atividade sunu rai, halo to’os iha área subaun boot ka área
sira besik subaun, labele tau ai-kose iha du’ut maran leten.
Labele
soe lisu hanesan tissue, plástiku, masa mamuk, kaixa mamuk falun hahán no mós
labele soe botir rahun hanesan serveja, kratingdaen no mós botir seluk tanba
manas bele sunu du’ut maran.
Inklui,
husu kolaborasaun sidadaun sira nian hodi kontribui hahalok pozitivu sira hodi
asegura ambiente liuliu bio diversidade Timor-Leste nian.
Jornalista:
Rafy Belo | Editór: Manuel Pinto
Foto:
Rai maran. Foto google
Sem comentários:
Enviar um comentário