sexta-feira, 22 de setembro de 2017

MPKM Hametin Relasaun Fraternidade ho Funsionariu

DILI, (TATOLI) – Ministru Prezidensia Konsellu Ministru (MPKM), Adriano do Nascimento halo enkontru ho funsionariu sira ho objetivu atu hametin relasaun fraternidade ne’ebé pertense iha ministériu, nune’e mós rona informasaun atu oinsá halo planu asaun anuál.

“Enkontru ne’e pertinente tanba atu hametin relasaun fraternidade iha instituisaun ida tanba ita mesak Timoroan, nune’e ita bele hakbesik ba malu entre ministru ho funsionariu hotu”, hateten ministru ba jornalista sira iha Auditórium Palásiu Governu, kinta (21/9).

Afirma tan, planu la’ós superiór de’it mak halo maibé tenke rona mós iha kraik liliu hirak ne’ebé tein, hamoos fatin no kondutór sira atu hadia instituisaun ne’e oinsá.

Klaru katak versaun la hanesan maibé oinsá ema hotu iha vizaun no misaun atu hadi’a parte ne’ebé hala’o kna’ar ba, katak ministru.


“Sei la eziste grupu ketak tanba funsionáriu hotu, tantu hosi nivel kraik to’o leten ho sentimentu pertensia atu sira sente katak sira mós ema ne’ebé apoiu ha’u nia servisu”, afirma nia.

Hosi hirak ne’e, nia dehan, servisu iha ministériu ne’e hotu-hotu iha objetivu ida de’it atu bele servi públiku tanba ne’e tenke presiza malu nafatin hosi ministru to’o hirak ne’ebé halo bé manas no hamoos fatin.

Enkuantu, governu da-Hituk liuhosi Primeiru Ministru, Marí Alkatiri fó hanoin katak governu foun ne’e la’ós mai atu sobu no haketak ema maibé mai ho hanoin atu identifika preokupasaun iha planeamentu, sistema no ezekusaun programa sira.

“Mai atu halo di’ak liu tan, la’ós atu hateten la gosta ema tenke hasai, hanoin hanesan ne’e la’os Timoroan tanba ne’e mak ita presiza tau hanoin hamutuk”, akresenta nia.

Funsionáriu públiku iha lei nia okos, lei mak regura sira tanba ne’e tenke iha disiplina no dezempeña funsaun ba kada funsionáriu no diretór sira.

Jornalista: Zezito Silva | Editora: Rita Almeida

Foto: Ministru Prezidensia Konsellu Ministru, Adriano do Nascimento.

Sem comentários: