Alkatiri Fihir Assanami no Agio Apresenta OJE Daruak

DILI: Primeiru Ministru, Mari Alkatiri, kontinua firme la ba Parlamentu Nasionál iha aprezentasaun daruak programa VII Governu Konstitusionál. Nune’e, fihir ona figura ne’ebé atu substitui Xefe Governu iha debate ne’e.

Tuir informasaun ne'ebé diáriu ne’e rekolla husi Palásiu Governu katak, enkontru Konsellu Ministru, foin lalais ne’e, Xefe Governu fihir ona figura rua ne'ebé iha poténsia boot atu reprezenta ninia fatin iha diskusaun ba daruak nian.

Figura na’in rua ne'ebé nakloke daudaun ona ba publika mak Ministru Estadu no Ministru Rekursu Minerais, Mariano ‘Assanami’ Sabino no Ministru Adjuntu Primeiru no Ministru ba Delimitasaun Fronteira, Hermenegildo ‘Agio’ Pereira.

Diáriu ne’e konfirma ba Ministru Assanami, maibé nia rasik mós seidauk iha informasaun klaru kona-ba asuntu ne’e, tanba reuniaun Konsellu Ministru, foin lalais ne’e, ko'alia liu ba revizaun programa tuir kestaun ne'ebé foti ona iha PN.

Nia akresenta katak, nu’udar pesoál seidauk hetan informasaun ida kona-ba kestaun ne’e. Maibé, iha posibilidade tanba PM rasik deklara sei la ba tan PN.

Ne'e duni se de’it mak PM sei hili nia mak sei prepara aprezenta programa no Orsamentu Retifikativu iha PN.

Hafoin aprezentasaun programa VII Governu nian ba dahuluk la pasa, Governu haree no hadi'a ona atu kompleta kestaun ne'ebé partidu opozisaun sira foti iha parlamentu hodi debate tan dala ida.

Entretantu, Primeiru Ministru, Mari Alkatiri hateten, programa VII Governu nian balun prontu ona, maibé sei hein dadus balun seidauk kompletu.

“Deputadu sira ezije dadus barabarak, ami tenke lori dadus kompletu dívida mak hira? Osan atu gasta ne’e hira ami tenke lori hotu. Deputadu mak ezije hakarak dadus ne’e kompletu, ami buka hela dadus ne’e. Ami sente katak kompletu ona ami lori ba”, tenik nia.

Semana Oin Governu Haruka OR ba PN

Nune’e, tuir planu, semana oin Governu sei haruka Orsamentu Retifikativu ba Parlamentu Nasionál (PN) hodi diskute ba diskusaun no aprovasaun.

Primeiru Ministru, Mari Alkatiri hateten, serbisu públiku barak agora osan laiha, tanba Orsamentu Retifikativu seidauk aprova.

Nia esplika, interpretasaun ida ke sala dehan, antes aprova Orsamentu Retifikativu tenke aprova uluk programa.

Orsamentu Retifikativu laiha ligasaun ho Programa, tanba programa ne’e ba Orsamentu Jerál Estadu (OJE) 2018 ninian “Orsamentu Retifikativu la presiza hein to’o programa Governu ninian atu hetan aprovasaun iha Parlamentu Nasionál”, dehan PM Alkatiri, iha Palásiu Prezidensiál Bairru-Pité, horisehik.

Ne’e duni, Governu prepara ona Orsamentu Retifikativu hodi aprezenta ba Parlamentu Nasionál iha semana oin. 

Tomé Amado | Independente