Labarik migrante sira hamutuk
1.200 resin mate ona dezde tinan 2014, no metade lakon sira nia moris bainhira
tenta atravesa Mediteráneu, fó sai hosi Organizasaun Internasional ba Migrasaun
sira (IOM), iha loron-sesta, ne'ebé admiti katak númeru sira ne'e bele aumenta
tan.
Mate sira ne'e reprezenta menus
5% hosi númeru total hosi migrante sira ne'ebé maka IOM rejista nia mate iha
períudu tempu hanesan, hatete hosi organizasaun iha komunikadu ida.
Organizasaun hatutan katak tanba
ne'e maka númeru loloos hosi labarik sira ne'ebé mate sei aas tebes, tanba
12,5% hosi komunidade global migrante sira seidauk iha tinan 18.
Hanesan ezemplu, iha vaga
migratóriu ne'ebé to'o iha tinan 2015 hosi tasi iha teritóriu sira Itália ho
Grésia, konta ona migrante hamutuk millaun ida, kuaze rihun 250 maka labarik
sira.
Iha kazu espesífiku hosi Itália,
70% hosi labarik sira ne'e hanesan la akompañadu.
IOM hatete katak hanesan susar
tebes halo rejistu ba migrante sira nia mate, misaun ne'ebé sei sai komplikadu
liu bainhira presiza determina vítima mortal nia tinan, informasaun ne'ebé
konfirma de'it hosi 40% kazu sira.
Entre mate hamutuk 1.202 hosi
migrante menor sira ne'ebé maka IOM rejista, iha 21% de'it maka hatene vítima
mortal sira nia tinan (58 seidauk iha tinan ida no 67 iha entre tinan ida to'o
tinan lima).
Ho baze hosi kazu identifikadu
sira, tinan médiu iha momentu mate nian maka tinan ualu.
Tanba falta informasaun kona-ba
labarik migrante sira, IOM realsa katak laiha posibilidade estabele, loloos,
dalan migratóriu saida maka perigozu liu ba labarik ki'ik sira.
Maski nune'e, organizasaun
internasional indika ona katak dalan Mediteráneu Oriental, hosi Turkia to'o
Grésia, hanesan perigozu tebes.
Pelumenus migrante na'in 396
ne'ebé seidauk to'o tinan 18 lakon ona sira nia moris bainhira atravesa dalan
Mediteráneu Oriental, na'in 164 seluk mate iha dalan Mediteráneu Sentral nian
(hosi Líbia ba Itália) no na'in 16 iha Mediteráneu Osidental (hosi Marokos to'o
España).
Iha fatin seluk iha mundu, IOM
rejista ona labarik migrante na'in 137 mate iha Áfrika, na'in 20 mate iha
fronteira entre Méxiko ho Estadus Unidus no na'in 18 iha Europa.
Kona-ba orijen hosi labarik sira
ne'e, na'in 803 mai hosi Ázia no Médio Oriente, na'in 171 hanesan laabrik
afrikanu no na'in 61 mai hosi nasaun sira hosi kontinente amerikanu. Seidauk
hatene nasionalidade hosi labarik na'in 167.
IOM harii iha tinan 1951, agora
daudaun sai hanesan organizasaun intergovernamental prinsipal ne'ebé dedikadu
ba área migrasaun nian.
SAPO TL ho Lusa
Sem comentários:
Enviar um comentário