quarta-feira, 14 de fevereiro de 2018

Tribunál Simu ona Pedidu Auditóriu ZEESM


DILI: Tribunál Kontas simu ona pedidu husi Primeiru Ministru, Mari Alkatiri, hodi halo auditoria ba mega projetu Zona Espesiál Ekonomia Sosiál Merkadu (ZEESM) ne’ebé implementa iha Rejiaun Autónoma Espesiál Oekusi-Ambenu (RAEOA).

Prezidente Tribunál Rekursu, Deolindo dos Santos hateten, Tribunal Kontas sei prepara ekipa ida hodi halo analiza ba pedidu husi Xefe Governu nian atu halo auditoria.

“Pedidu primeiru ministru nian ne’e kona-ba halo auditoria ba ZEESM. Ida ne’e maka tama Tribunál sei haree hodi ezerse ninia kompeténsia nu’udar Tribunál Kontas”, dehan nia, hafoin soru-mutu ho xefe Estadu, iha Palásiu Prezidensiál Bairru-Pité, horisehik.

Nia hatutan, Tribunál Kontas sei tau iha planu hodi haree posibilidade ba auditoria mega projetu ne’e.

“Tribunál Rekursu la’o tuir planu ne’ebé iha ona, ne’ebé pedidu primeiru ministru nian ne’e Tribunál sei haree para sei tau iha ne'ebá tuir posibilidade ne’ebé Tribunál Rekursu rasik iha”, tenik Deolindo

Nune’e, iha soru-mutu ho Prezidente Repúblika, Prezidente TR mós relata kona-ba matéria planu anuál Tribunál Rekursu no Kámara Kontas nian iha tinan ida ne’e.

Antes ne’e, Sekretáriu Jerál FRETILIN, Mari Alkatiri dehan, tinan 10 nia laran programa barak mak Governu anteriór sira halo PDIP, PEDN, maibé programa sira ne’e patina iha fatin de’it.

Nia dehan, osan ne’ebé sira gasta ne’e husi fundu petrolíferu hamutuk biliaun $14, maibé osan hirak ne’e nia-paradeiru to’o ne’ebé ohin loron povu Timor Leste kontinua moris ki’ak.

Ne’e duni, iha FRETILIN nia ukun, hakarak ezije osan sira ne’ebé gasta nia rezultadu oinsá ona no paradeiru osan ne’e to’o iha ne’ebé, povu to’o ohin loron kontinua moris mukit.

Nune’e, Xefe Governu mós hakarak koordena ho empreza balun no mós tribunál kontas atu halo auditoria ba projetu boboot sira iha Timor laran tomak hahú husi Oekusi to’o Lautem.

Komesa Uluk iha RAEOA

Primeiru Ministru (PM), Mari Alkatiri, mós konkorda atu auditóriu haat loke hahú komesa iha Rejiaun Autónoma Espesiál Oekusi Ambenu (RAEOA).

Autoritáriu ne’e loke ba hahú uluk ba Finansas, Auditóriu Infraestrutura, Auditóriu Turizmu no auditóriu tezoureiru.

Nia parte sei koordena no Prezidente Tribunál de Kontas no Tribunál Rekursu halo auditoria ba RAEOA para identifika servisu hotu la’o tuir transparénsia ou lae tenke fó sai.

Cristina Ximenes | independente

Sem comentários: