SNC Prezerva Memória Pasada

DILI, (TATOLI) – Diretór Ezekutivu Sentru Nasionál Chega, Institutu Públiku, Hugo Maria Fernandes, hateten SNC hetan mandatu hosi governu hodi prezerva memória pasada.

ʺIta ukun án tinan 10 resin, maibé seidauk iha inisiativa estabelese memoriál sira hanesan ne’e hodi hanoin hikas fali ita nia istória luta naruk to’o hetan independénsiaʺ, dehan Diretór Ezekutivu hafoin partisipa iha seremonia lansamentu plaka memoriál proklamasaun independénsia unilaterál RDTL 28 novembru 1975 iha prasa Palásiu Governu, ohin.

Institutu ne’e prezerva memoria pasada iha tipu barak hanesan estabelese iha fatin istóriku sira hanesan fatin proklamasaun Palásiu Governu.

Lansamentu plaka memoriál ne’e hanesan meiu ida atu introdus istória ba jerasaun foun sira ne’ebé  la partisipa direta iha prosesu luta ba ukun rasik án hafoin restaurasaun independénsia.

Parte seluk tulun governu liuhosi Ministériu Turizmu hodi trasnforma ba fatin turizmu tanba turista rai-liur barak hakarak vizita fatin istóriku hirak ne’e.

Fatin istória memoriál iha Dili maka Palásiu Governu, Semitériu Santa Kruz, komarka Balide, Tasitolu, Kaza Europea, Otél Turizmu no seluktán.

Tanba ne’e tenke mantein orijinalidade hosi fatin istóriku hirak ne’e atu mantein valór istóriku.

SNC vizaun maka prezerva memoria pasada nu’udar lisaun ba povu TL no umanidade tomak hodi hametin dame. Misaun maka harii sentru pós-konflitu ne’ebé prezerva memória pasada hodi promove direitu no valór umanu, harii parseira nasionál no internasionál atu reforsa rede servisu sira hodi implementa rekomendasaun Komisaun Akollamentu Verdade no Rekonsiliasaun (CAVR-sigla portugés) no Komisaun Verdade no Amizade (CVA-sigla portugés) ne’ebé relevante.

Jornalista: Agapito dos Santos | Editora: Rita Almeida

Imajen: Plaka ne’ebé prepara hosi Sentru Nasionál Chega. Foto GPM