Opozisaun timoroan kritika ona
primeiru-ministru ho membru sira seluk Governu nian tanba la suspende funsaun
sira durante kampaña eleitoral, ne'ebé hahú iha loron-tersa ne'e, ba
lejislativu antesipadu iha loron 12 Maiu iha Timor-Leste.
Visi-prezidente hosi Aliansa
Mudansa ba Progresu (AMP), ne'ebé halibur forsa tolu hosi opozisaun iha
parlamentu, Fidelis Magalhães, hatete ba Lusa katak "iha nasaun
demokrátiku sira tenki iha separasaun ida entre ezersísiu hosi poder ezekutivu
bainhira iha situasaun normal no durante períudu eleitoral".
Sekretáriu Estadu hosi
Komunikasaun Sosial, Matias Boavida, hatete katak iha kazu primeiru-ministru
Mari Alkatiri nian, ne'ebé hanesan mós sekretáriu-jeral hosi Frente
Revolucionária do Timor-Leste Independente (Fretilin), "sei laiha
substituisaun" durante kampaña.
"Primeiru-ministru sei
mantén nafatin nia funsaun sira nu'udar primeiru-ministru", subliña hosi
Boavida iha deklarasaun sira ba Lusa.
Lejislasaun timoroan nian la
hatete loloos kona-ba suspensaun ba funsaun sira hosi membru sira Governu nian
durante períudu kampaña nian, ho lejislasaun kona-ba titular sira hosi órgaun
sira soberania nian esplika katak elementu sira hosi ezekutivu "bele suspende
de'it funsaun sira iha kazu sira ne'ebé maka permiti hosi lei", hodi fó
sira nia kompeténsia ba membru sira ezekutivu ne'ebé maka depende ba sira.
Tuir lei eleitoral ne'ebé hala'o,
entre prinsípiu sira ne'ebé tenki respeita durante kampaña iha "imparsialidade
hosi entidade públiku sira ba kandidatura sira", kestaun ne'ebé aumenta
iha dekretu hosi Governu ne'ebé regula kampaña eleitoral.
"Durante hala'o nia knaar
sira, funsionáriu públiku sira ho funsionáriu sira ne'ebé ho responsabilidade
publiku tenki atua ho imparsialidade tomak hasoru partidu polítiku sira ka
koligasaun partidáriu sira, hodi la partisipa ka hala'o atividade ruma hosi
propaganda eleitoral nian", refere hosi dekretu ne'e.
Deputadu AMP nian hatete mós
katak hein "atu laiha abuzu ka uzu hosi rekursu públiku sira ba finalidade
eleitoral nian" hodi akuza partidu sira iha Governu, Fretilin ho Partidu
Demokrátiku (PD), halo ona durante pré-kampaña.
AMP halibur Congresso Nacional da
Reconstrução Timorense (CNRT), Partidu Libertasaun Popular (PLP) ho Kmanek
Haburas Unidade Nacional Timor Oan (Khunto).
Iha tinan liubá, membru oioin
hosi Governu timoroan nian, inklui primeiru-ministru, suspende temporáriu ona
sira nia knaar hodi bele akompaña kampaña sira hosi sira nia partidu, maski
governasaun iha nafatin garantia.
Suspensaun ne'e abranje membru
sira hosi forsa polítika oioin tanba Governu uluk iha elementu sira hosi forsa
tolu hosi forsa haat ne'ebé iha fatin iha parlamentu, liuliu CNRT, Fretilin ho
PD.
Iha momentu ne'ebá, suspensaun
hosi funsaun sira hanesan fakultativu, nune'e la'ós membru tomak hosi Governu
halo, no sira seluk uza férias ka lisensa sira, indika hosi fonte sira hosi
anterior ezekutivu timoroan nian.
SAPO TL ho Lusa
Sem comentários:
Enviar um comentário