AMP Halo Manuál Programa Ba Kada Munisípiu

AINARO, (TATOLI) - Bloku Aliansa Mudansa ba Progresu (AMP) halo manuál programa ba kada munisípiu oinsá atu dezenvolve munisípiu ida-idak iha Timor.

Manuál programa ne’e aprezenta hosi Prezidente Bloku AMP, Kay-Rala Xanana Gusmão liuhusi komísiu polítika (kampaña) ba dahuluk ne’ebé hala’o iha Postu Administivu Ainaro Vila, Munisípiu Ainaro, Tersa ne’e.

Iha Manuál Programa refere, ko’alia kona-ba oinsá dada bee-moos ba komunidade, fornese enerjia eletrisidade ba komunidade ne’ebé seidauk asesu ba ahi, konstrusaun estrada liga munisípiu ida ba munisípiu seluk, liga munisípiu ba postu administrativu, suku, aldeia no selu-seluk tan.

Prezidente AMP, Xanana Gusmão deklara katak AMP kompromete atu realiza programa hirak ne’e durante tinan lima (2018-2023) nia laran tanba ukun án nia objetivu maka oinsá atu hadi’a Nasaun no povu nia moris.

Xanana iha okaziaun ne’e deklara katak nia labele transmite programa hirak ne’e ida ba ida ba komunidade tanba konteudu hosi programa ne’e barak tebes, tan ne’e nia fahe de’it manuál programa iha livru ba komunidade atu lee.

Eis líder rezisténsia ne’e mós husu ba komunidade Ainaro atu vota ba AMP tanba AMP sei garante estabilidade nasionál no sei garante instituisaun Estadu atu labele monu ba krize institusionál ne’ebé akontese hanesan agora.

Partisipa iha komísiu ne’e maka Portavóz AMP, Taur Matan Ruak, konsileiru AMP, José dos Santos Naimori Bucar, veteranu balun, eis membru arte marsiais, individu balun hosi Partidu Demokrátiku (PD) no komunidade rihun ba rihun. Komísiu hala’o iha tuku 11:30-13:45 Otl.

Jornalista: Xisto Freitas | Editór: Manuel Pinto

Imajen: Abertura komísiu polítika bloku AMP iha Munisípiu Ainaro, tersa ne’e. Imajen espesiál.