MANATUTU, (TATOLI) - Premiadu
Nobel Pás nian, José Ramos Horta, deside apoiu sekretáriu jerál partidu
Fretilín, Mari Alkatiri tanba tuir nia haree actual Primeiru Ministru, Mari
Alkatiri, nu’udar jestór di’ak atu hadi’a rai Timor.
“Buat ne’ebé aat iha tinan 10
liubá buka hadi’a, buat ne’ebé halo tiha ona, maibé ladi’ak buka hadi’a. Ha’u
tanba sá apoia Alkatiri, apoia FRETILIN, ha’u lakohi tanba ideolojia ruma, ha’u
haree ba ema ne’ebé bele kaer rai ne’e didi’ak, haree ba ema ne’ebé hatene halo
jestaun iha Governu, hatene harii Estadu ho ain haat,” José Ramos Horta
deklara iha abertura kampaíña Partidu Fretilín, ohin iha Manatutu.
Tuir Ramos Horta programa
FRETILIN mak hadi’a buat ne’ebé tenke hadi’a, harii buat foun ne’ebé tenke
harii.
La’ós ida ne’e de’it, Adjuntu
Sekretáriu Jerál FRETILIN, José Reis, hatutan oras to’o ona atu hametin sentidu
Estadu, Estadu direitu demokrátiku no hametin Timor-Leste ida buras liután.
Oras to’o ona atu hapara figura
iha Timor-Leste, maibé buka hametin organizasaun Estadu iha Timor-Leste.
Tanba ida ne’e, lori Fretilín nia
naran dezafia Manatutu mak tenke manán ho boot liu hodi hatudu Manatutu
defende Estadu direitu demokrátiku no la defende ema ida ka rua.
Sekretáriu Jerál Partidu
Fretilín, Mari Alkatiri hatutan hodi dehan, Fretilín hili halo abertura
kampaíña iha Munisípiu Manatutu tanba hakarak manan iha munisípiu refere
bainhira realiza eleisaun Antisipada. Ho mehi ida ne’e tuir oráriu kampaíña
Fretilín hili munisípiu Manatutu fatin hodi halo kampaíña dala rua.
“Ha’u hakarak garante katak
vitória FRETILIN iha Manatutu atu hahú iha Laleia, liuhusi Manatutu Vila no
taka iha Laklubar hamutuk ho Laklo, Soibada no Natarbora.” Aktual Primeiru
Ministru ne’e promete.
Tuir Alkatiri bainhira FRETILIN
kaer ukun, sei hasai povu husi mukit. Hodi hatudu katak Fretilín ukun ho asaun.
Jornalista: Maria Auxiliadora | Editór:
Manuel Pinto
Imajen: Militantes no
simpatisantes Partidu Fretilin wainhira partisipa iha kampanha eleitoral
parlamentar nian iha Tasi Tolu, 19 Juilu 2017.Timor Leste sei halao eleisaun
Parlamentar nian dia 22 Juilu. Foto TATOLI/Antonio Goncalves
Sem comentários:
Enviar um comentário