Partidu Demokratiku Sei Loke Aeroportu iha Rasa

LOSPALOS: Partidu Demokratiku (PD) kompromete sei loke kampu aviasaun (aeroportu) iha suku Rasa hodi fasilita aviaun komersiu ba Lospalos.

Tuir Presidente Partidu Demokratiku Mariano Assanami Sabino hatete, Partidu Demokratiku iha politika atu investe iha infraestrutura liu liu iha estrada, aeroportu no portu atu bele fasilita povu hodi asesu ba merkadu.

Investimentu ba transportasaun ne’e importante tanba ne’e atu dezenvolve setór ekonomia tenke iha estrada, portu no eroportu atu bele fasilita industria péskas atu bele tula produtu ba estranjeiru.

“Ita sei loke aeroportu iha rasa hodi bele tula produtus komersiu sira hodi ba estranjeiru no nasional,”dehan Assanami, iha Kampu Futebool Lospalos.

Alende ne’e aeroportu Rasa ne’ebé PD hakarak konstrui ne’e bele mós fasilita Lautem oan sira halo viajen husi nasional ba munisipiu.

Konseptu ba konstrusaun aeroportu Rasa ne’e feitu hotu ona hein atu implementa tanba haree ba potensialidade ekonomia iha Lospalos boot tebes hanesan Industria Peskas, Turismu ida ne’e atu fasilita hotu prosesu ida ne’e.

“Kuandu ita nia investimentu iha infraestrutura bazika sira ne’e konstrui hotu ona bele garantia movimetasaun publiku nian husi nasional, munisipal no rejional kuandu ida ne’e funasiona hotu ona bele hasa’e rendimentu povu nian no bele hatama mos retornu ba kofre estadu nian”.

Jacinto Xavier | Independente