Lu-Olo konfiante atu ema tomak sei serbisu hamutuk hafoin votu

Prezidente Repúblika, Francisco Guterres Lu-Olo, hatudu konfiante, iha loron-sábadu ne'e, iha partisipasaun maka'as iha lejislativu antesipadu ne'ebé maka akontese no katak, la haree ba rezultadu sira, líder polítiku sira sei serbisu hamutuk.

"Hanesan loron importante ida ba timoroan tomak no liuliu ba sira ne'ebé vota, ne'ebé sei ba vota ba futuru, ba sira nia kondisaun di'ak moris nian", nia hatete ba jornalista sira hafoin vota tiha iha eskola ida iha sentru Díli nian.

"Ha'u hanoin katak sei iha partisipasaun maka'as. Iha kampaña, ema sira partisipa maka'as no ema sira ne'e ohin iha fila hodi husik sira nia votu di'ak ba Timor nia futuru", nia afirma.

Hatán kona-ba saida maka bele akontese hafoin votasaun, Lu-Olo hatete katak rezultadu "tenki simu hosi partidu ho koligasaun tomak".

"Iha kompetisaun iha sé maka manán no sé maka lakon. Lalika haree ba rezultadu, partidu polítiku sira tenki hakru'uk ba povu nia desizaun", nia afirma.

Afirma katak durante kampaña iha opsaun ne'ebé la hanesan, balun "ko'alia ba istória, balun ba programa sira", xefe Estadu hatete katak ema timoroan tomak hakarak "serbisu ba nasaun nia futuru".

"Ha'u fiar ho laran katak partidu konkorente sira, la depende ba rezultadu, sei kontribui ba Timor-Leste nia futuru", nia hatutan mós.

Xefe Estadu vota iha estasaun ida hosi estasaun haat votu nian hosi Eskola 1 Farol nian, hanesan sentru votasaun ida hosi sentru votasaun tolu hosi suku Motael, iha zona sentral sidade Díli nian, ne'ebé iha eleitor resenseadu hamutuk 3.990.

Hamutuk, iha ona eleitor rihun 785 ne'ebé maka bele vota to'o tuku 15:00, iha estasaun votu hamutuk 1.160, fahe iha sentru votasaun hamutuk 885 no instala iha suku hamutuk 452 iha nasaun laran.

Eleitor sira iha estranjeiru bele vota mós iha Austrália (Darwin, Melbourne ho Sydney), iha Koreia-Súl (Seul), iha Portugal (Lisboa ho Porto) no iha Reinu Unidu (iha Dungannon, Londres ho Oxford). Iha estranjeiru, fatin sira votu nian loke iha períudu hanesan: 07:00 to'o tuku 15:00 - oras lokal.

SAPO TL ho Lusa