domingo, 13 de maio de 2018

AMP lidera ho 49,32% hosi votu sira hafoin apura tiha votu balun


Aliansa Mudansa ba Progresu (AMP) lidera kontajen hosi votu sira iha lejislativu antesipadu loron-sábadu ne'e iha Timor-Leste, ho 49,32% halakon Frente Revolucionária do Timor-Leste Independente (Fretilin) ne'ebé iha 33,13%, bainhira sei konta de'it votu hamutuk 24,97%.

Tuir informasaun ofisial sira hosi Sekretariadu Tékniku Administrasaun Eleitoral (STAE), Partidu Demokrátiku (PD) hanesan partidu datoluk ne'ebé hetan liu votu ho 8,17% no Frente Dezenvolvimentu Demokrátiku (FDD) hanesan partidu dahaat ho 6,26%.

Informasaun parsial sira hanesan úniku ofisial sira ne'ebé maka fó sai to'o tuku 23:00 oras Timor nian (tuku 15:00 iha Lisboa), liutiha oras ualu hafoin taka fatin votu iha Timor-Leste no bainhira taka ona urna sira iha Lisboa ho Porto.

Agora daudaun, iha de'it partidu haat maka liu ona limiti hosi 4% hosi votu ne'ebé presiza hodi hili deputadu sira.

STAE fó sai mós informasaun ikus dahuluk sira hosi votasaun.

Prosesu kontajen ofisial hanesan demora tanba tenki halo hakat oioin ba verifikasaun nian.

Rede sosial sira timoroan nian iha liu kontajen parsial ne'ebé avansadu liu tanba halo ho baze hosi kontajen sira hosi fiskal sira partidu nian.

Maski nune'e, valor sira ne'ebé maka partidu sira fó sai la muda tendénsia ba lideransa hosi AMP.

SAPO TL ho Lusa

Sem comentários: