Hosi António Sampaio, ajénsia
Lusa
Kontajen votu sira iha eleisaun
lejislativu, loron-sábadu ne'e, iha Timor-Leste hala'o daudaun iha munisípiu
tomak nasaun nian, iha prosesu naruk ida ne'ebé sei demora oras barak nia laran
no rede sosial sira "halakon" daudaun informasaun ofisial sira.
Ho kontajen ne'ebé hotu ona iha
fatin balun iha fatin sira ne'ebé ladún iha eleitor sira iha nasaun no fiskal
sira hosi partidu oioin haruka, lalais, rezultadu sira ne'e ba sira nia mákina
sira iha Díli, liutiha tempu balun hafoin taka fatin votasaun sira mosu kedas
informasaun parsial sira.
Buat hotu serve hodi komunika
nafatin kontajen ida ne'ebé, iha nível ofisial, Sekretariadu Tékniku hosi Administrasaun
Eleitoral (STAE) bele hahú de'it fó sai informasaun ofisial iha oras balun
tuirmai ne'e.
Hodi akontese, kontajen sira
tenki hotu iha fatin sira votasaun nian, urna sira tenki lori ba sede munisípiu
sira no hafoin ne'e maka konfirma ata sira hodi nune'e STAE bele fó sai
informasaun sira hosi STAE iha nia sede iha Dìli.
To'o tempu ne'e, mensajen sira
liuhosi Facebook, foto sira ho sura-tahan manuskritu sira, ne'ebé konta ho
liman - kontajen sira sei hato'o, parsialmente, ho pelumenus tendénsia hanesan
ida: votu sira barak liu maka fó ab forsa favorita rua: Aliansa Mudansa ba
Progresu (AMP) ho Frente Revolucionária do Timor-Leste Independente (Fretilin).
Tendénsia ida ne'ebé konfirma iah
vizita ida ba sentru votasaun ruma iha kapital ne'ebé númeru sira hosi forsa
rua iha boletin votu nian - númeru 4 ba Fretilin no númeru 8 ba AMP - hanesan
númeru sira ne'ebé mosu beibeik.
Iha sala aula ida hosi Eskola 30
Agostu, iha zona oriental sidade nian observador oioin, fiskal partidáriu sira
ho ofisial eleitoral sira, tuur iha rai, hakerek nafatin, risku ba risku,
númeru sira ne'ebé maka funsionáriu eleitoral konta nafatin: "haat, ualu,
ualu, haat".
alaruma, maibé ladún akontese,
votu ida iha "rua" hosi Partidu Demokrátiku ka, ladún akontese
maka'as, iha "hitu" hosi Frente Dezenvolvimentu Demokrátiku (FDD).
Diferensa entre partidu boot rua
no partidu rua seluk maka, pelumenus iha 30 Agostu, maka'as tebes: AMP iha votu
110, Fretilin 90, PD iha de'it 12 no FDD ualu.
Pelumenus iha ne'e, liutiha oras
rua hafoin taka fatin votu sira, laiha forsa polítika haat seluk ne'ebé maka
hetan votu.
Eskola 30 Agostu, besik iha
rotunda ne'ebé iha estátua hosi herói nasional ida, Nicolau Lobato nian, halo
parte hosi suku Komoro, ne'ebé iha númeru boot hosi eleitor sira iha Timor-Leste.
Iha de'it Komoro (ne'ebé iha
sentru votasaun ualu no estasaun votu hamutuk 21) iha eleitor resenseadu
hamutuk 28.416. Zona halo parte hosi postu administrativu Dom Aleixo, ne'ebé
iha liu votante sira iha munisípiu kapital nian: hamutuk rihun 71 ka kuaze
metadu hosi munisípiu tomak.
Kontajen votu hanesan prosesu
kleur ida no nakonu ho ritual.
Hanesan ezemplu, momentu antes
taka urna sira, ofisial eleitoral balun sei husu iha resintu katak sei iha
eleitor balun ka la'e.
"Lalais, lalais. Besik taka
ona", hatete joven ida hosi Sekretariadu Tékniku Administrasaun Eleitoral
(STAE) nian ne'ebé destaka iha sentru votasaun ne'e.
Hafoin ne'e, responsável
eleitoral deklara katak taka ona urna sira no iha sala aula ida-idak ne'ebé
funsiona estasaun votu sira hahú kedas prosesu naruk antes hahú konta votu
sira.
Ba dala uluk tenki anula, ho
karimbu ida ho liafuan- "La Uza", boletin votu ida-idak ne'ebé la
nesesáriu: halo ona impresu liu 10% duké eleitor sira no, tanba ne'e, iha
boletin barak maka sei hetan karimbu.
Hafoin taka entrada sira hosi
urna sira, verifika númeru série sira hosi selu sira ne'ebé uzadu, komprovadu
boletin hira maka presiza ona no hira maka la uza no asina ata dahuluk sira.
Prosesu ida-idak sertifikasaun
nian konklui iha sala aula ida-idak no hafoin ne'e, iha observasaun hosi fiskal
partidáriu sira, ofisial eleitoral sira ho observador sira, urna sira lori ba sala
aula boot ida.
No iha fatin ne'e maka loke hodi
hahú rona kanta númeru sira no haree ema hakerek risku sira, iha grupu hosi ema
na'in lima, iha surat-tahan mutin ne'ebé kola iha kuadru eskola nian.
SAPO TL ho Lusa
Sem comentários:
Enviar um comentário