“Mai Ita Kaer Liman Hamutuk Ba Labarik Sira-nia Moris Di’ak”

DILI, (TATOLI) - Reprezentante UNICEF (United Nation International Children Fund), iha Timor-Leste, Valerie Taton, sujere ba jornalista sira, husi elektróniku no imprensa, iha otel Vila Verde, ohin, atu serbisu hamutuk, kaer liman hamutuk hodi dezenvolve labarik sira-nia moris di’ak.

“Tempu ona atu halao asaun no kria ambiente ida ne’ebé sira bele krese ho sira-nia potensialidade. Ho parseria SEKOMS nian no ho ita-boot sira-nia apoiu, ha’u hanoin ita bele mudansa pozitivu mak ita hakarak. Mai ita kaer liman hamutuk ba labarik sira-nia moris di’ak,” dehan Valerie Tanton.

Valerie mós akresenta katak UNICEF kontinua firme atu apoia governu no parseiru sira hotu atu atinji meta sira mak fortalese abordajen dezenvolvimentu labarik ki’ik ida koordenadu no olistiku ba labarik sira iha Timor-Leste (TL).

Investe ba iha dezenvolvimentu labarik ki’ik oferese mós fundasaun importante ba dezenvolvimentu sustentável. Tanba, labarik sira ohin loron no jerasaun tuir mai amk sei determina futuru kiletiva ida nabilan ka nakukun.

“Kustu husi la halo asaun ne’e boot tebes,” salienta reprezentante UNICEF ne’e, iha sorumutu ho mídia: dezenvolvimentu labarik ki’ik, organiza husi Sekretariadu Estadu Komunikasaun Sosiál (SEKOMS) ho UNICEF Timor-Leste, perante jornalista sira.

Sekretáriu Estadu Komunikasaun Sosiál, Matias Boavida, iha nia intervensaun, hateten katak media hola papel sentrál ba kresimentu labarik sira nian.

Nune’e sujere ba profisionál komunikasaun sosiál sira husi media oioin, dezenvolve labarik sira liuhusi kapasidade sira ne’ebé mak iha, atu nune’e labele husik hela sira ba kotuk, nune’e ida de’it, hamutuk la’o ba oin, nune’e mós dezenvolvimentu.

“Kna’ar media oinsa ita proteje sira. Ita prepara labarik sira, nune’e bele útil,” dehan governante ne’e.

Nia mós akresenta, governu ne’ebé mai bele investe liutan ba edukasaun atu nune’e prepara labarik sira di’ak liutan ba futuru.

“Partidu bele ketak, kontinuasaun estadu iha ita hotu-nia liman, ita-nia kabaas,” konklui Sekretáriu Estadu, Matias Boavida.

Entretantu, sorumutu media, organiza husi SEKOMS no UNICEF ne’e, nia objetivu mak atu halo dialogu kona-ba Dezenvolvimentu Labarik Ki’ik (ECD-sigla inglés), asuntu importante ida relasiona ho dezenvolvimentu labarik sira nian.

Iha sorumutu ne’e konsege mós estabele rede jornalista ida ho naran Rede Media ba Dezenvolvimentu Labarik, koordena husi jornalista TATOLI ida, Zezito da Silva “Zemacar” no reprezenta feto, jornalista ida husi STL (Suara Timor Lorosa’e).

Jornalista: Rafy Belo | Editór: Manuel Pinto