Somotxo: Timor-Leste La’ós Alvu ba Terrorista

DILI, (TATOLI) — Ministru Defeza no Seguransa, José Agostinho Sequeira Somotxo, hateten Timor-Leste la’ós alvu ba terrorista tanba laiha sentru ekonómiku.

“Ha’u azvezes hamnasa uitoan bainhira informasaun oi-oin mosu iha ita nia rai. Imi hotu hatene katak bainhira terrorista sira hakarak ataka fatin ruma ne’e tenke iha alvu. Alvu iha Timor-Leste ne’e saida? Ita laiha sentru ekonómiku. Ita nia sentru ekonómiku ne’e maka Timor Plaza no edifísiu Ministériu Finansa andar 10 iha Aitarak-Laran ne’e maibé ki’ik”, Somotxo ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin relata pontu situasaun seguransa ba Prezidente Repúblika, Francisco Guterres Lú Olo.

Somotxo hatutan terrorista ne’e la’ós oho ema ida susesu ona, maibé tenke iha nia impaktu ekonómiku.

Tuir nia ida ne’e hanesan tátika militár ne’ebé dezvia ema nia atensaun para taka iha sorin (Indonézia), tanba ne’e, Indonézia maka tenke atensaun maka’as tanba dezvia ona Indonézia nia atensaun mai Timor-Leste nune’e terrorista sira bele livre halo atake iha territóriu Indonézia.

“Ha’u dehan ona ba Embaixadór Indonézia iha Timor-Leste katak ne’e hanesan ami uluk funu karik dehan manobra diversaun. Diverse ema nia atensaun ba fatin seluk, nune’e bele ataka iha fatin seluk”, nia haktuir.

Somotxo apela ba komunidade atu labele preokupa ho isu ida ne’e (terrorista) tanba ajente informasaun no polísia sira la’o hela atu buka hatene terrorista tama Timor liuhusi ne’ebé no iha ona ne’ebé.

“Ita iha polísia ne’ebé treinu ba antí terrorizmu no agora sira halo hela operasaun ba isu refere. Maibé, prátika real terrorista iha Timor ne’e laiha. Ha’u sente moe kuandu ita haruka ita nia polísia ba halo operasaun ba buat ne’ebé mamuk. Terrorista sira bele hamnasa fali ita”, afirma.

Jornalista: Xisto Freitas | Editora: Rita Almeida

Imajen: Ministru Defeza no Seguransa, José Agostinho Sequeira ‘Somotxo’